آئندہ سال انجمن حامئی مسلمین منائےگا اپنے قیام کی صدی کا جشن؛ صد سالہ جشن کی تقریبات بنیں گی بھٹکل کی تاریخ کا حصہ
بھٹکل 22/اکتوبر (ایس او نیوز) بھٹکل کے سب سے قدیم و باوقارقومی تعلیمی ادارہ انجمن حامئی مسلمین نے اپنے سوسال مکمل کرلئے ہیں اور اس خوشی میں انجمن اگلے سال یعنی 2019 میں جنوری کے ابتدائی ہفتہ سے ہی صد سالہ تقریبات کا شاندار آغاز کرنے جارہا ہے۔
انجمن میٹنگ ہال میں منعقدہ پریس کانفرنس سے خطاب کرتے ہوئے انجمن کے صدر جناب عبدالرحیم جوکاکو نے بتایا کہ جنوری پہلے ہفتہ سے ڈسمبر آخر تک صد سالہ جشن کے موقع پر مختلف پروگرامس، سیمینارس وغیرہ منعقد کئے جائیں گے جس میں سیاسی اور مذہبی شخصیات کے ساتھ ساتھ ماہر تعلیم اور دانشوران کو بھی مدعو کیا جائے گا۔
صدسالہ تقریبات کے تعلق سے گفتگو کرتے ہوئے انہوں نے بتایا کہ جنوری کے پہلے ہفتے میں (غالباً جمعہ کے دن) دوپہرڈھائی بجے انجمن آباد سے ایک عوامی ریلی کے ساتھ پروگرام کا آغاز ہوگا، یہ ریلی شمس الدین سرکل ہوتے ہوئے اولڈ بس اسٹائنڈ، سلطان اسٹریٹ، چوک بازار اور محمد علی روڈ ہوتے ہوئے اسلامیہ اینگلو اُردو ہائی اسکول میدان پہنچ کر جلسہ کی شکل اختیار کرے گی ، جہاں صد سالہ پروگرام کی تفصیلات سے عوام کو آگاہ کیا جائے گا ۔
اگلے روز انجمن آباد میں صبح دس بجے عوامی افتتاحی پروگرام ہوگا جس میں ایک سیاسی اور ایک مذہبی شخصیت کو مدعو کیا جائے گا، ساتھ ساتھ مقامی اداروں کے ذمہ داران کو بھی مدعو کیا جائے گا اس موقع پر انجمن کی شروعات سے لے کر اب تک کی کارکردگی کی رپورٹ اور خدمات کا جائزہ پیش کیا جائے گا۔جلسہ میں انجمن کےخدام قوم، بہترین اساتذہ، سنئیر اسٹاف سمیت تمام یونیورسٹی رینک ہولڈرس کی تہنیت کی جائے گی، جبکہ اسی دن شب کو انجمن کے تحت چلنے والے 17 اسکولوں اور کالجوں کےطلبہ تفریحی پروگرامس پیش کریں گے جس میں عوام کی کثیر تعداد شریک ہونے کی توقع ہے۔
تیسرا دن خواتین کے لئے مختص ہوگا، خواتین نے انجمن کے لئے جو خدمات دی ہیں، اُن کے ساتھ ساتھ یونیورسٹی پر رینک حاصل کرنے والی طالبات کی تہنیت کی جائے گی، جبکہ اسی شام کو انجمن کی طالبات تفریحی پروگرام پیش کریں گی۔اس کے اگلے روز نوائط محفل کی طرف سے نوائطی زبان میں مختلف پروگرامس پیش کئے جائیں گے۔
پریس کانفرنس میں انجمن اور انجمن کے بانیان کا مختصر تعارف سمیت انجمن کی خدمات کا بھی خاکہ پیش کیا گیا اور اس موقع پر صد سالہ تقریبات کا ایک لوگو بھی ریلیز کیا گیا۔
پریس کانفرنس میں انجمن کے جنرل سکریٹری صدیق اسماعیل، ایڈیشنل سکریٹری اسحاق شاہ بندری،صدسالہ تقریب کے کنوینر عبدالرقیب ایم جے ندوی، نائب صدر انجمن عبدالرحمن باطن،سابق سکریڑی پرائمری اسکول ایس ایم عبدالعظیم، جیلانی شاہ بندری، عنایت اللہ شاہ بندری، آصف دامودی، آفتاب حُسین کولا، ڈاکٹر زبیر کولا ، ایڈوکیٹ آفاق کولا و دیگر ذمہ داران موجود تھے۔
خیال رہے کہ سوسالہ سفر میں انجمن نے ملت کے نونہالوں کے لئے نرسری سے لے کر انجینرنگ، پوسٹ گرائجویٹ، پی ایچ ڈی تک کی اعلیٰ تعلیم کا قابل قدر انتطام کیا ہے ۔ انجمن کی تعلیمی سرگرمیوں کی شروعات سن 1919 میں ہوئی تھی۔
