ہاسن جنسی اسکینڈل معاملے میں جے ڈی (ایس) لیڈر ایچ ڈی ریونّا عدالت کی جانب سے عبوری ضمانت مسترد ہونے کے بعد گرفتار
بنگلورو 4 مئی (ایس او نیوز) سابق وزیر اعظم اور جے ڈی (ایس) سپریمو ایچ ڈی دیوے گوڑا کے فرزند اور ہولے نرسہا پور کے جنتادل ّ(ایس) رکن اسمبلی ایچ ڈی ریونّا کو خصوصی تحقیقاتی ٹیم (ایس آئی ٹی) نے پدمنابھ نگر میں واقع دیوے گوڈا کے مکان سے ہفتہ کی شام حراست میں لے لیا ہے۔ ان کے خلاف جنسی ہراسانی اور اغوا کا معاملہ درج ہوا تھا۔ ذرائع نے بتایا کہ ریونّا کو اغوا کیس کے سلسلے میں حراست میں لیا گیا ہے۔
ذرائع کے مطابق ان پر لگے اغوا معاملے میں جیسے ہی عدالت نے عبوری ضمانت دینے سے انکار کیا، تفتیشی ٹیم نے انہیں حراست میں لے لیا اور انہیں مزید کارروائی کے لیے ایس آئی ٹی کے دفتر لے جایا گیا۔
ایچ ڈی ریونّا اور ان کے بیٹے پرجول ریونّا کے خلاف جنسی طور پر ہراساں کرنے کا پہلا معاملہ 28/اپریل کو ہاسن کے ہولے نرسہاپور ٹاون پولس تھانہ میں درج کیا گیا تھا۔باپ اور بیٹے دونوں پر 47 سالہ گھریلو ملازمہ کو جنسی طور پر ہراساں کرنے کا الزام تھا۔
دوسرا معاملہ یکم مئی کو سی آئی ڈی نے پرجول کے خلاف درج کیا تھا جس میں ہاسن کی سابق ضلع پنچایت ممبر نے پرجول پر بار بار عصمت دری کرنے کا الزام لگایا تھا۔ تیسرا کیس 2 مئی کو میسور کے کے آر نگر پولیس اسٹیشن میں درج کیا گیا تھا جس میں ریونّا سمیت ستیش بابنّا پر الزام لگایا گیا تھا کہ پرجول کے ذریعے جنسی زیادتی کا نشانہ بننے اور زندہ بچ جانے کے بعد اُس خاتون کو اغوا کیا گیا ہے۔
ملزم بابنّا کو جمعہ کے دن گرفتار کرکے عدالتی ریمانڈ پر جیل بھیجا گیا،جبکہ سنیچر کو تفتیش کاروں نے اغوا شدہ خاتون کو ایک فارم ہاوس سے برآمد کرلیا جو میسور کے ہنسور تعلقہ کے کلینا ہلّی دیہات میں ہے، بتایا گیا ہے کہ یہ فارم ہاوس مبینہ طور پر ایچ ڈی ریونّا کے کسی معاون کا ہے۔
یاد رہے کہ 28 اپریل کو ہولے نرسہاپور ٹاون پولس نے دیوے گوڈا کے پوتے 33 سالہ پرجول ریونّا اور ان کے والد ایچ ڈی ریونّا کے خلاف شکایت درج کی تھی جب مبینہ طور پر تین ہزار فائلوں کے ساتھ ایک پین ڈرائیو میں موجود فحش وڈیوزہاسن لوک سبھا حلقہ میں بڑے پیمانے پر سوشل میڈیا پر گردش کرنے لگی تھی، اس تعلق سے ایک 47 سالہ خاتون نے پرجول اور اس کے والد ریونّا کے خلاف جنسی ہراسانی کا معاملہ درج کیا تھا ۔ معاملہ منظر عام پرآتے ہی پرجول ریونّا بنگلور سے جرمنی فرار ہوگیا،بعد میں پتہ چلا کہ وہ جرمنی سے دبئی پہنچا ہے،اب پتہ چلا ہے کہ وہ دبئی سے بھی کسی دوسرے ملک میں روپوش ہوگیا ہے۔ اس دوران سنیچر کو پرجول ریونّا کے والد ایچ ڈی ریونّا کو بنگلور پولس نے گرفتار کرلیا ہے۔
بتاتے چلیں کہ پرجول ریونّا ہاسن کے ایم پی ہیں، جبکہ اِس با ر ہوئے لوک سبھا انتخابات میں وہ جے ڈی ایس۔بی جے پی کے مشترکہ اُمیدوار بھی ہیں اور ہاسن میں لوک سبھا انتخابات 26 اپریل کو ہی ہوچکے ہیں۔