سرسی: نقلی دستاویزات کی بنیاد پر کاروں کی خریداری - بینکوں کو دیا گیا کروڑوں روپیوں کا دھوکہ
سرسی 4 / مئی (ایس او نیوز) موٹر گاڑیوں کی خریداری کے لئے فریب کاروں کی ایک ٹولی کے ذریعے نقلی دستاویزات کی بنیاد پر کروڑوں روپے قرضہ لینے اور پھر گاڑیاں نہ خریدتے ہوئے کےڈی سی سی بینک کے علاوہ کئی نیشنلائزڈ بینکوں کو دھوکہ دینے کا معاملہ سامنے آیا ہے۔
سرسی تعلقہ کی تین چار کو آپریٹیو سوسائٹیوں سے کروڑوں روپیوں کا موٹر وھیکل لون لینے کے بعد اسے کسی اور مقصد کے لئے خرچ کرنے کا معاملہ دو تین مہینے قبل منظر عام پر آیا جس سے معلوم ہوا کہ نوجوانوں کی ایک گینگ اس فراڈ میں شامل ہے جو گاڑیوں کی خریدی کے لئے لیا گیا قرضہ آن لائن گیم ، گوا کے جوا خانوں (کیسینو) اور دیگر عیاشیوں میں اڑانے کا کام کرتی ہے۔
اس دھوکہ باز گینگ کا طریقہ یہ رہا ہے کہ وہ کے ڈی سی سی بینک اور دیگر نیشنلائزڈ بینکوں میں جا کر موٹر گاڑی خریدنے کے لئے قرضہ کی مانگ رکھتے ہیں۔ بینک والے اس قرضے کے جو دستاویزات طلب کرتے ہیں اسے جعلی طور پر تیار کیا جاتا ہے ۔ ہبلی کے آدی شکتی شو روم کے نام سے بینک میں کھاتہ کھولا جاتا ہے۔ حقیقی طور پر ہبلی میں اس نام کا شو روم موجود ہی نہیں ہے ۔ پھر یہ لوگ نئی کار کا ایک فوٹو، کار کی ایک نقلی چابی اور دیگر نقلی دستاویزات بینک افسران کے پاس جمع کرواتے ہیں۔
اسی طرح کے ڈی سی سی بینک والے سرسی، منچیکیری سمیت چار پانچ شاخوں سے نقلی دستاویزات کی بنیاد پر 28 موٹر کاروں کے لئے قرضہ منظور کروایا جاچکا ہے۔ پتہ چلا ہے کہ گاڑی کے لئے جاری کیے گئے قرضوں کے چیک ان جعلسازوں نے دوسری جگہوں سے کیش کروائے ہیں اور اس رقم کو کسی اور ہی مقصد کے لئے خرچ کیا ہے۔
فراڈ کا یہ معاملہ صرف کے ڈی سی سی بینک تک محدود نہیں رہا ہے بلکہ کئی بڑے بینکوں سے بھی اسی طرز پر قرضہ حاصل کرکے دھوکہ دینے کے معلومات سامنے آئے ہیں۔ ذرائع کے مطابق چار پانچ اہم بینکوں سے تقریباً 50 موٹر کاروں کے لئے قرضہ لیا گیا ہے۔ اس جعلساز گینگ نے بعض بے گناہ لوگوں کے نام پر بینک کھاتے کھلوا کر بینکوں سے رقم اڑائی ہے۔
معلوم ہوا ہے کہ کے ڈی سی سی بینک کی منچیکیرے شاخ کے منیجر نے جب متعلقہ مقام پر پہنچ کر خریدی گئی کار کا عینی مشاہدہ کرنے کی کوشش کی تو فراڈ کا یہ پورا معاملہ روشنی میں آیا۔ سمجھا جاتا ہے کہ اس معاملے کے تعلق سے اسی ہفتے کے ڈی سی سی بینک کے منیجروں کی طرف سے سپرنٹنڈنٹ آف پولیس کے پاس شکایت درج کروائی جائے گی، اس کے بعد پولیس کی تحقیقات سے اس گینگ کی کارستانیوں کا خلاصہ سامنے آنے کی توقع ہے۔