بھٹکل کے تاریخی ’کوکتی تالاب‘کو نیا روپ دینے کا کام ہوگیا شروع
بھٹکل،11؍جون (ایس او نیوز) بھٹکل کا مشہور اور تاریخی’کوکتی تالاب‘ جو ایک زمانے سے مٹی اور کیچڑ جمع ہونے کی وجہ سے پوری طرح مٹنے کے قریب آگیا تھا اب اس کو صاف کرکے نیا روپ دینے کا کام شروع کیا گیا ہے۔
خیال رہے کہ بھٹکل میں انتہائی شدید گرمی کے موسم میں بھی یہ تالاب ہمیشہ ٹھنڈے پانی سے بھرا رہتا تھا۔ مگر پچھلے کچھ دہائیوں سے اس میں مٹی زیادہ اور پانی کم ہوگیا تھا جس سے اطراف کے کنوؤں میں پانی کی سطح بھی کم ہوتی چلی گئی تھی۔سوسگڈی سروے نمبر 386میں 9ایکڑ 6گُنٹے کے علاقے میں پھیلا ہوایہ تالاب 2کلو میٹر تک کے احاطے میں کاشتکاری اور پینے کے پانی کا اہم ذریعہ ہے۔ اس میں جمنے والے کیچڑ اور مٹی کی وجہ سے اب صرف برسات کے موسم میں ہی یہ تالاب پانی سے بھرا ہو ا نظر آتا ہے۔سال 2019کے دوران گرمی کے موسم میں یہاں سب سے کم پانی کی سطح دیکھنے کو ملی تھی۔
کوکتی تالاب کی صفائی اور گہرائی بڑھانے کے لئے ریاستی حکومت کی جانب سے 25لاکھ روپے کا منصوبہ بنایا گیا ہے۔ اس منصوبے پر عمل پیرائی کے لئے ایم ایل اے سنیل نائک نے فنڈ جاری کروایا ہے۔ تالاب سے کیچڑ اور مٹی نکالنے کے علاوہ اس کے اطراف میں پچینگ کا کام بھی کیا جائے گا۔ امید کی جارہی ہے کہ تالاب کی صفائی کے بعد آس پاس کے گھروں کے کنوؤں میں پانی کی سطح بڑھ جائے گی اور زرعی مقاصد کے لئے بھی وافر مقدار میں پانی دستیاب ہوگا۔
ایم ایل اے سنیل نائک نے بتایا کہ اس تالاب کو مزید بہتر بنانے، اس کے اطراف باڑھ لگانے اور لوگوں کے بیٹھنے کے لئے نشستیں وغیرہ لگاکر اس کو ایک خوبصورت روپ دینے کا سپنا ڈاکٹر چترنجن نے دیکھا تھا۔ اس منصوبے پر ایک کروڑ روپے تک خرچ آنے والاہے۔ میں اس اس سپنے کو پورا کرنے کے لئے ریاستی حکومت کے پاس تجویز پیش کروں گا۔
