بھٹکل 11 دسمبر (ایس او نیوز) بھٹکل کے معروف پرشورام اسپورٹس کلب بھٹکل کے زیراہتمام تعلقہ کے موڈبھٹکل میدان میں پرشورام کے آنجہانی کبڈی کھلاڑی منوج نائک کی یاد میں 24 اور 25 دسمبر کو ایک بین ضلعی کبڈی ٹورنامنٹ کا انعقاد کیا گیا ہے جس میں ریاست کے سات اضلاع کی کبڈی تیمیں حصہ لیں گی۔ اس بات کی اطلاع پرشورام اسپورٹس کلب کے بانی صدر ایم بی نائک نے ایک پریس کانفرنس میں دی۔ انہوں نے کہا کہ ٹورنامنٹ میں دیگر اضلاع سے دلچسپی رکھنے والی ٹیموں کو بھی شرکت کی اجازت رہے گی۔
ٹورنامنٹ میں پہلی پوزیشن پر آنے والی ٹیم کو 44444 روپے نقد اور ٹرافی، رنر اپ ٹیم کو 33333 روپے نقد اور ٹرافی اور تیسرے اور چوتھے نمبر پر آنے والی ٹیم کو 11111 روپے اور ٹرافی دی جائے گی۔ اس کے علاوہ بیسٹ رائیڈر، بیسٹ کیچر، سیریز بیسٹ سمیت انفرادی طور پر بھی کھلاڑیوں میں انعامات تقسیم کیے جائیں گے۔
ٹورنامنٹ میں شرکت کرنے والے کھلاڑیوں کو مفت رہائش، کھانا اور سفری اخراجات فراہم کیے جائیں گے۔ ایک بہترین گیلری نما اسٹدیم تیار کیا جائے گا تاکہ تماشائی بغیر کسی پریشانی کے بیٹھ کر ٹورنامنٹ دیکھ سکیں، اس موقع پر ضلع انچارج وزیر کوٹا سری نواس پجاری، ایم ایل اے سنیل نائک اور سابق ایم ایل اے وغیرہ بھی موجود رہیں گے۔
پرشورام کلب کی تاریخ کی 4 دہائیاں:
کلب کے بانی ایم بی نائک نے بتایا کہ 1978 میں قائم ہونے والا پرشورام اسپورٹس کلب 44 سال مکمل کر کے 45 سال میں داخل ہو گیا ہے۔ یہ کلب دسمبر کے مہینے میں ہی قائم ہوا تھا ، اسی لیے ہم دسمبر میں ہی ٹورنامنٹ کا انعقاد کر رہے ہیں۔ اسپورٹس کلب نے گزشتہ 44 سالوں میں کئی اتار چڑھاؤ دیکھے ہیں لیکن صرف کھیلوں کی سرگرمیاں تسلسل کے ساتھ جاری ہیں۔ اسپورٹس کلب کے کئی کھلاڑیوں نے نہ صرف ریاستی اور قومی سطح پر بلکہ پرو کبڈی ٹورنامنٹ میں بھی حصہ لے کر ٹیم اور ضلع کی شہرت میں اضافہ کیا ہے۔ گرو، پرسنا، رنجیت جو اس وقت پٹنہ پائریٹس کے لیے کھیل رہے ہیں وہ بھی پرشورام ٹیم کے کھلاڑی ہیں۔ یہ اسپورٹس کلب کسی ذات، مذہب یا جماعت تک محدود نہیں ہے۔ انہوں نے وضاحت کی کہ سنیل نائک، جو بھٹکل میں موجودہ ایم ایل اے ہیں، بھی اسی ٹیم کے کھلاڑی ہیں۔
پریس کانفرنس میں پرشورام اسپورٹس کلب کے صدر گنیش ایس۔ نائک، سکریٹری دیوراج جٹپا نائک، ایم ایچ۔ گنیش، مستپا لچھمیا نائک، یوگیش دیواڈیگا، تھیمپا نائک، بھاسکر نائک، راگھویندر نائک اور دیگر موجود تھے۔