خانہ پور(بیلگام) :18؍ جنوری (ایس اؤ نیوز )گذشتہ لوک سبھا انتخابات میں جیت حاصل کرنےکےبعدعوامی رابطہ سے منقطع اترکینرا کے رکن پارلیمان اننت کمار ہیگڈے نے جب خانہ پور کا دورہ کرتےہوئے کارکنان کی میٹنگ منعقد کی تو میٹنگ میں ایم پی کے سامنے ہی کارکنان نے اپنی بے اطمینانی کا اظہار کرتےہوئے اننت کمارہیگڈے کو آڑےہاتھوں لیا۔
میڈیا رپورٹ کے مطابق ایم پی اننت کمارہیگڈے کی صدارت میں بی جےپی کارکنان کی منعقدہ میٹنگ میں پارٹی کارکنان نے ایم پی کو راست مخاطب کرتےہوئےکہاکہ پچھلے کئی برسوں سے تم ہمارے رابطہ میں نہیں ہو، تمہار ا پی اے بھی ہماری باتوں کو سنی ان سنی کر رہاہے، ترقیاتی کام رک سے گئےہیں، حلقہ کےمسائل کی فہرست ایم پی کے سامنے رکھتے ہوئے کارکنان نے اپنی بے اطمینانی کا اظہار کرتے ہوئے کہا کہ ہمارے حلقہ میں کوئی کام نہیں ہوا ہے۔
کارکنان نےکہاکہ خانہ پور کے لوگ بیلگام جاتےہیں تو کہاجاتاہے کہ کاروار جائیں۔ کاروار جاتےہیں تو بولا جاتاہے کہ تم بیلگام ضلع سے تعلق رکھتےہو وہیں جاؤ۔ اب عوام چکی کی دو پاٹوں کے درمیان پسے جارہےہیں کوئی پوچھنے والا نہیں ہے۔ تم 6مرتبہ لوک سبھا ممبر منتخب ہوئے لیکن ایک بھی مرکزی حکومت کا منصوبہ خانہ پور میں جاری نہیں ہوا۔ تمہاری طرف سے کارکنان کو کوئی فائدہ نہیں ہورہاہے، عوام سوال کررہے ہیں کہ اننت کمار ہیگڈے کہاں ہے،تمہاری ملاقات کےلئے ہم لو گ 200کلومیٹر دور بھی جا تےہیں تو تم ہمیں نہیں ملتے۔
کارکنان کی بے اطمینانی اور راست مسائل کو پیش کرنے سے اننت کمارہیگڈے نے پینترا بدلتےہوئےکہاکہ میں یہاں انتخابات کے لئے نہیں آیاہوں۔ ہائی کمان کس کو ٹکٹ دےگی مجھے پتہ نہیں ہے، میرا مقصد صرف یہی ہےکہ مودی کو دوبارہ وزیرا عظم بنانا ہے۔ اسی لئے میں حلقہ میں بھاگ دوڑ کررہاہوں۔ میری نجی بعض وجوہات تھیں جس کی بنا پر میں حلقہ کا دورہ نہیں کرسکا۔