بھٹکل میں موسلادھار بارش کا سلسلہ جاری؛ چھ مکانوں کو نقصان؛ بعض راستوں کی حالت بد سے بدترہونے پر عوام سخت پریشان
بھٹکل 19 جون (ایس او نیوز) بھٹکل سمیت ساحلی علاقوں اور ملناڈ وغیرہ میں گذشتہ ایک ہفتہ سے موسلادھار بارش کا سلسلہ جاری ہے، بھٹکل میں ویسے تو تھوڑے تھوڑے وقفے کے بعد زوردار بارش ہورہی ہے تو وہیں ملناڈ اور پڑوسی علاقوں میں زبردست بارش ہونے کی اطلاعات موصول ہورہی ہیں جس کے نتیجے میں ہوناور کے ساحلی قصبوں میں ڈیم کا پانی چھوڑنے سے ندیوں میں طغیانی جاری ہے۔ ہوناور کے بعض علاقوں میں شراوتی ندی کے اطراف رہنے والوں کو راحت کیمپوں میں منتقل کرنے کی بھی خبریں ہیں۔
بھٹکل میں سنیچر صبح سے ہوئی طوفانی ہواوں کے ساتھ بارش کے نتیجے میں چھ مکانوں کو نقصان پہنچنے کی خبر ملی ہے۔ تحصیلدار دفتر سے ملی اطلاع کے مطابق کائیکنی میں نفیسہ عباس شیخ، بینگرے میں ایرمّا مادیو نائک، لکشمی راما کرشنا نائک، گنپتی منجپّا نائک، تارا اور ماولّی میں راما باکڈ کے مکانوں کو نقصان پہنچا ہے۔ اطلاع کے مطابق آفسران نے متعلقہ مکانوں پر پہنچ کر نقصانات کا جائزہ لیا ہے۔
بارش کے چلتے جن علاقوں میں انڈر گراونڈ ڈرینیج کے لئے پائپ لائن بچھانے کےلئے روڈ کی کھدائی کی گئی تھی اور وہاں پر نالوں کو مٹی ڈال کر ڈھانپ دیا گیا تھا، وہاں سڑٖکوں سڑکوں کی حالت اتنی زیادہ حد خراب ہے، گاڑیوں کا گذر ناممکن ہوگیا ہے، کارگیدے اور گڈ لک روڈ پر ویسے تو عارضی طور پر سخت مٹی ڈال کر عوام کو راحت پہنچائی گئی ہے، البتہ دیگر علا قوں بالخصوص علی پبلک اسکول والی سڑک کی خستہ حالت سے متعلقہ علاقہ کے عوام سخت پریشان ہیں اور حکام سے مطالبہ کررہے ہیں کہ فوری طور پر سڑک کی درستگی کی طرف توجہ دی جائے۔
