پی ایم مودی کے ہندو۔مسلم والے حالیہ بیانات کو لے کر راہول گاندھی نے کہا؛ انتخابات میں مودی حکومت کی ہار یقینی ہے اس لئے مودی گھبراگئے ہیں، کچھ دنوں میں آسکتے ہیں آنسو
بیجاپور، 27/اپریل (ایس او نیوز /ایجنسی) پی ایم مودی کے حالیہ ہندو۔مسلم بیانات او رکانگریس کے انتخابی منشور کو لے کر غلط بیانی پر مودی کو نشانہ تاکتے ہوئے کانگریس لیڈر راہول گاندھی نے کہا کہ لوک سبھا انتخابات میں مودی حکومت کی ہار یقینی ہے، اس لئے وہ اقتدار ہاتھ سے نکلنے کو لے کر گھبرا گئے ہیں، مودی کی زبان سے اب گارنٹی نکل چکی ہے، عوام کے پاس دکھانے کے لئے کوئی کام نہیں رہ گیا ہے، اس لئے اُلٹے سیدھے بیانات اور جھوٹ کا سہارا لے کر عوام کو پھر ایک بار بے وقوف بنانے کی کوششوں میں لگ گئے ہیں۔ راہول گاندھی نے کہا کہ شاید اگلے چند دنوں میں اسٹیج پر ہی وہ رو بھی سکتے ہیں اور رو کر عوام سے ووٹ مانگ سکتے ہیں۔
بیجاپور میں لوک سبھا انتخابات کے دوسرے مرحلے کی ووٹنگ کے دوران راہل گاندھی نے جلسۂ عام سے خطاب کرتے ہوئے کہا کہ پی ایم مودی اصل موضوع پر سے توجہ ہٹانے کے لئے جھوٹ او نفرت کا پروپیگندہ کرکے 24 گھنٹے کوشش کررہے ہیں۔ کبھی وہ پاکستان اور چین کی بات کرنے لگ جاتے ہیں تو کبھی وہ آپ کو تالی و تھالی بجانے اور موبائیل کی فیلش لائٹ جلانے کے لیے کہتے ہیں۔ راہل گاندھی نے کہا کہ نریندر مودی نے پچھلے دس سالوں میں غریبوں سے صرف پیسہ چھینا ہے۔ انہوں نے ملک کے 22 لوگوں کو اتنا پیسہ دیا جتنا ملک کے 70 کروڑ لوگوں کے پاس ہے۔ ہندوستان میں ایک فیصد لوگ ایسے ہیں جو ملک کی 40 فیصدی دولت پر قابض ہیں۔ اس لیے کانگریس پارٹی بیروزگاری اور مہنگائی مٹاکر آپ کو حصہ داری دے گی۔ جتنا پیسہ نریندر مودی نے ارب پتیوں کو دیا ہے، اتنا پیسہ ہم ہندوستان کے غریبوں کو دیں گے۔
راہل گاندھی نے اپنے خطاب میں مزید کہا کہ نریندر مودی نے گزشتہ 10 سالوں میں 20-25 لوگوں کو ارب پتی بنایا ہے۔ انہوں نے ہوائی اڈے، بندرگاہ، بجلی، کانیں، شمسی- ہوائی توانائی، دفاعی شعبے سب کچھ اڈانی اور ان جیسے ارب پتیوں کے حوالے کر دیا لیکن غریبوں کو کچھ نہیں دیا۔ دوسری جانب کرناٹک میں کانگریس پارٹی نے جو بھی گارنٹیاں دی تھیں، اسے پورا کر دکھایا ہے۔ آپ کی تالیاں اس بات کا ثبوت ہیں۔