دکشن کنڑا میں انتخابی ضابطہ اخلاق کے تحت قائم ہوئے چیک پوسٹس - نقدی اور بیش قیمت اشیاء لے جانے کے لئے ضروری ہوگا دستاویزی ثبوت
منگلورو، 18 / مارچ (ایس او نیوز) دکشن کنڑا میں انتخابی ضابطہ اخلاق کے نفاذ کے ساتھ محکمہ پولیس نے حفاظتی بندوبست تیز کر دیا ہے اور عوام سے کہا ہے کہ اگر وہ اپنے ساتھ نقد رقم یا قیمتی اشیاء لے جاتے ہیں تو انہیں اس سے متعلقہ باضابطہ دستاویزی ثبوت اپنے پاس رکھنا ہوگا اور جانچ کے دوران افسران کے سامنے پیش کرنا ہوگا ۔
پولیس کی طرف سے جاری ہدایات میں کہا گیا ہے کہ اگر نقد رقم پچاس ہزار روپوں سے زیادہ ہو تو اس کے ضروری دستاویز ثبوت اپنے پاس رکھنا ضروری ہوگا جس سے معلوم ہونا چاہیے کہ یہ رقم کہاں سے آئی ہے اور کہاں پہنچائی جا رہی ہے ۔ اگر نقد رقم بینک یا اے ٹی ایم سے نکالی گئی ہے تو اس کی پرچی (سلِپ) یا اس سے متعلقہ بینک پاس بک جانچ افسر کو دکھانا ہوگا ۔ اگر ایسا نہیں کیا گیا تو اس شخص کے خلاف ایف آئی آر درج کی جا سکتی ہے ۔
اگر کسی کے پاس موجود نقد رقم کا تعلق شادی یا اس طرح کے کسی فنکش سے ہے تو اس فنکشن کا دعوت نامہ ساتھ میں رکھنا ہوگا اور یہ تجارتی معاملے سے متعلق رقم ہے تو تجارتی دستاویز اپنے پاس رکھنا ہوگا ۔
خیال رہے کہ دکشن کنڑا میں فی الحال جملہ 23 چیکس پوسٹ قائم کیے گئے ہیں جس میں بین الریاستی سرحدوں پر 9 ، بین الاضلاع سرحدوں پر 7 اور مقامی سطح پر 7 چیکس پوسٹس شامل ہیں ۔ اس کے علاوہ ضلع کے اہم مقامات پر جانچ پڑتال اور نگرانی کے لئے موبائل اسکواڈ کو متحرک کر دیا گیا ہے ۔