بیدر میں مسجد کے مؤذن کی بے رحمی سے پٹائی؛ شدید زخمی مؤذن اسپتال میں داخل، حملہ آور اسسٹنٹ سب انسپکٹر معطل
بیدر،9/اپریل (ایس او نیوز) ایسے وقت میں جب کرناٹک میں کورونا وائر س کی روک تھام کے لیے لاک ڈاؤن جاری ہے، اس دوران ریاست کے مختلف حصوں میں فرقہ پرستوں کی جانب سے مسلمانوں پر حملوں کی وارداتیں پیش آرہی ہیں۔ اسی سلسلے کی ایک کڑی کے طورپر بیدر ضلع کے ہمنا آباد سے پولیس کی زیادتی کا ایک معاملہ سامنے آیا ہے۔
بتایا جاتا ہے کہ ہمنا آباد کی ایک مسجد مؤذن کو پولیس کے ایک اسسٹنٹ سب انسپکٹر نے بری طرح سے پیٹ دیا، جس سے مؤذن کی ناک اور منہ شدید طور پر زخمی ہوئے ہیں، انہیں اسپتال میں داخل کردیا گیا ہے۔
اس واقعہ کی اطلاع ملنے پر رکن راجیہ سبھا سید نصیر حسین نے علاقے کے آئی جی پی اور بیدر ضلع کے ایس پی سے بات کی۔ ان کے علاوہ سابق وزیر رحیم خان اور ہمنا آباد کے رکن اسمبلی راج شیکھر پریل نے بھی ایس پی اور ضلع کے ڈپٹی کمشنر سے بات کی اور پولیس کی اس زیادتی کے بارے میں شکایت کی۔
ضلع کے ایس پی نے بتایا کہ حملہ کرنے والے اسسٹنٹ سب انسپکٹر بسوراج کو ملازمت سے معطل کردیا گیا ہے۔ بتایا جاتا ہے کہ بسوراج نے بلاوجہ اس مؤذن کی پٹائی کی تھی۔ مقامی لوگوں نے بتایا کہ اے ایس آئی کی یہ کارروائی غیر ضروری تھی۔ پولیس نے اس سلسلے میں بسوراج کے خلاف ایک معاملہ درج کرلیا ہے۔