دبئی سے منگلورو ہوائی کرایہ میں اچانک بھاری اضافہ - عید کے لئے وطن لوٹنے والے پریشان - ون وے کرایہ ہوگیا 50 ہزار روہے!
منگلورو،25 / جون (ایس او نیوز) عید منانے کے لئے دبئی سے منگلورو ہوائی سفر کا منصوبہ بنانے والے ساحلی علاقے کے غیر رہائشی باشندوں کے لئے ہوش اڑانے والی خبر یہ ہے کہ اچانک ہوائی کرایہ میں بھاری اضافہ کر دیا گیا ہے اس وقت دبئی سے منگلورو تک کا یکطرفہ کرایہ 50 ہزار روپے ہوگیا ہے۔
یو اے ای میں گرمی کی تعطیلات شروع ہوگئی ہیں اور بقر عید بھی چند ہی دنوں میں منائی جانے والی ہے ۔ ایسے دیگر خلیجی ممالک کی طرح امارات میں مقیم غیر رہائشی ہندوستانی باشندوں نے بھی فطری طور پر اپنے وطن لوٹنے کے منصوبے بنا رکھے تھے ۔ اب یہ جو ہوائی کرایہ میں زبردست اضافہ کیا گیا ہے اس سے محسوس ہو رہا ہے کہ کم آمدنی والے افراد کی امیدوں پر پانی پھر گیا ہے اور وہ آس اور یاس کے بیچ پھنس کر رہ گئے ہیں۔
موصولہ اطلاعات کے مطابق 25 جون کو ایئر انڈیا ایکسپریس پر دبئی سے منگلورو تک کا ون وے کرایہ 53,887 روپے تھا اور 26 جون کے لئے یہ کرایہ 50,471 روپے ہے ۔ جبکہ انڈیگو طیاروں پر یہ کرایہ بالترتیب 50,582 روپے اور 52,000 روپے ہے ۔ جس کا مطلب یہ ہے کہ اگر چار افراد والی ایک فیمیلی عید پر اپنے وطن لوٹنا چاہتی ہے تو اسے یکطرفہ کرایہ کی مد میں 2 لاکھ روپوں سے زائد رقم خرچ کرنی پڑے گی ۔ اس وجہ سے ایسے افراد کا سفر کرنے کے سلسلے میں پس و پیش کرنا فطری بات ہے۔
سفری ضروریات پوری کرنے والے ٹریول بزنس سے وابستہ افراد کا کہنا ہے کہ ہر سال چھٹیوں کے موسم میں ٹکٹوں میں اضافہ ہوتا ہے ، مگر اس مرتبہ اس میں بے حد اضافہ ہوا ہے ۔ اس کا سبب یہ ہے کہ منگلورو اور دبئی کے درمیان صرف انڈیگو اور ایئر انڈیا ایکسپریس جیسی دو ہی ہوائی کمپنیاں اپنے راست پروازیں اس روٹ پر چلاتی ہیں ۔ ان کے مقابلے پر دوسری کمپنیاں نہیں ہیں ۔ لہٰذا یہ کمپنیاں اس کا بھر پور فائدہ اٹھا رہی ہیں۔
البتہ منگلورو سے دبئی جانے والوں کے لئے فی الحال کرایہ بہت ہی کم چل رہا ہے اور فی الحال 12 ہزار تا 15 ہزار روپے فی کس کے حساب سے ٹکٹیں دستیات ہیں ۔ جبکہ ممبئی سے دبئی کے لئے ہوائی کرایہ کی قیمت اس سے بھی کم چل رہی ہے ۔ اس کے علاوہ کنور سے بھی کرایہ کی قیمتیں کم ہیں ۔ مگر ان روٹس سے سفر اتنا آسان نہیں ہوتا جتنا کہ راست منگلورو فلائٹس سے ہوتا ہے ۔ اس لئے ساحلی علاقے کے مسافر اسی روٹ کو ترجیج دیتے ہیں۔
گر ٹریول ایجنٹس کی بات مانیں تو یہ کرایہ اکتوبر اور ستمبر میں کم ہو جائے گا اور پھر دسمبر میں کرسمس اور نیو ایئر کے موقع پر پھر ایک بار اس میں بھاری اچھال آَئے گا۔