اُترکنڑا کے عازمین حج کے لئے بھٹکل میں فراہم کی گئی ویکسین کی سہولت؛ سفر حج پر ضلع سے روانہ ہوں گے 220 لوگ
بھٹکل2/ مئی (ایس او نیوز) ضلع اُترکنڑا کے عازمین حج کے لئے جمعرات کو بھٹکل تنظیم ہال میں ویکسین کی سہولت فراہم کی گئی، جس کے لئے ضلع حج کمیٹی کی جانب سے تمام عازمین حج کو ویکسین کے لئے بھٹکل تنظیم آفس پہنچنے کی ہدایت جاری کی گئی تھی۔
سرکاری کوٹہ پرضلع اُترکنڑا سے 220 لوگ حج کے مبارک سفر پر روانہ ہورہے ہیں، جس میں بھٹکل کے 150 سےزائد عازمین شامل ہیں۔ کثیر تعداد میں بھٹکل کے عازمین ہونے کی وجہ سے ضلع حج کمیٹی نے گذشتہ سال کی طرح اس باربھی قومی سماجی ادارہ مجلس اصلاح وتنطیم کی درخواست پر بھٹکل میں ہی ٹیکہ کاری کی سہولت فراہم کی ، جس سے بھٹکل و اطراف سمیت ضلع بھر کے عازمین شریک ہوئے۔
صبح دس بجے ویکسینیشن کی کاروائی شروع ہوئی، پہلے غیربھٹکلی عازمین کو موقع فراہم کیا گیا، جس کے بعد مقامی لوگوں کے لئے ویکسین کی کاروائی شروع کی گئی۔ ضلع بھر سے آئے ہوئے لوگوں کے لئے مشروبات اور پانی وغیرہ کے انتظام کے ساتھ دوپہر کے کھانے کا بھی مناسب انتظام کیا گیا تھا۔
حج کے سفر پرجانے والوں کے لئے مولانا عبدالنور فکردے ندوی اور مولانا جعفر فقیہ بھاو ندوی نے معلومات فراہم کیں ۔
بھٹکل کے ایک بزرگ حاجی نے بتایا کہ اس سے پہلے بھٹکل کے عازمین کو حج کے سفر پر روانہ ہونے کے لئے کاروار جانا پڑتا تھا، سو سے زائد لوگوں کو کاروار جانے کے لئے بسوں کے دھکے کھانے پڑتے تھے یا پھر کئی سواریوں اور ٹیکسیوں کو بُک کرکے جانا پڑتا تھا، وہاں جانے کے بعد بھی ٹیکہ کاری میں دشواریاں ہوتی تھی، مگر تنظیم نے بھٹکل میں ہی یہ سہولت فراہم کرکے عازمین حج کے لئے بہت ساری آسانیاں فراہم کیں ہیں اور اس کے نتجے میں قوم و ملت کی لاکھوں روپیوں کی بھی بچت ہوئی ہے۔
اس موقع پر کمٹہ کے ایک عازم نے بتایا کہ چند سال پہلے جب میں اپنے والد اور والدہ کو حج کی ویکسین کے لئے کاروارلے کر گیا تھا تو وہاں بہت زیادہ پریشانی ہوئی تھی، اِدھر سے اُدھر دوڑایا گیا تھا، لیکن جب ہمیں پتہ چلا کہ اِس بار بھٹکل تنظیم میں ہی اس کی سہولت فراہم کی گئی ہے تو انتہائی خوشی اور اطمینان ہوا، اور جب ہم بھٹکل پہنچے تو ہمیں کچھ بھی دوڑ دھوپ کرنے کی ضرورت نہیں پڑی، بہت ہی آسانی کے ساتھ کاروائیاں مکمل ہوئیں ، یہاں تنظیم کھانے پینے کی بھی ہرطرح کی سہولیات فراہم کیں تھیں جس سے ہم پورے سکون و اطمینان کے ساتھ ٹیکہ کاری کی کاروائی مکمل کی۔
ٹیکہ کاری کے لئے کرناٹکا حج کمیٹی، بنگلورآفس سے جناب توقیر احمد خان کو بھٹکل روانہ کیا گیا تھا، جنہوں نے کاروار اور بھٹکل ہیلتھ آفسران کے تعاون سے تنظیم ہال میں تمام لوگوں کی ٹیکہ کاری کے بعد ہیلتھ سرٹی فیکٹ جاری کی۔ اس موقع پر بھٹکل ہیلتھ آفسر ڈاکٹر سویتا کامتھ کی نگرانی میں سرکاری اسپتال کے اسٹاف موجود تھے۔
مجلس اصلاح و تنظیم بھٹکل کے صدرعنایت اللہ شاہ بندری، نائب صدرعتیق الرحمن مُنیری، جنرل سکریٹری عبدالرقیب ایم جے ندوی، اُڈپی کے سابق وقف بورڈ چیرمین یحیٰ ناخوا، تنظیم کے دیگر ذمہ داران جیلانی شاہ بندری، اقبال سہیل، محمد حُسین معلم، عبدالسمیع کولا، عبدالماجد رکن الدین، امتیاز اُدیاور، نصیف خلیفہ، عبدالسمیع میڈیکل، مصطفیٰ عسکری وغیرہ پیش پیش تھے۔
