ملاپورم لوک سبھا ضمنی الیکشن: ڈاکٹر تسلیم احمد رحمانی ایس ڈی پی آئی امیدوار
ملاپورم۔(ایس او نیوز/پریس ریلیز) سوشیل ڈیموکریٹک پارٹی آف انڈیا (ایس ڈی پی آئی) کے قومی جنرل سکریٹری الیاس محمد تمبے نے ملاپورم میں منعقدہ ایک پریس کانفرنس میں اعلان کیا کہ ایس ڈی پی آئی قومی سکریٹری ڈاکٹر تسلیم احمد رحمانی ملاپورم لوک سبھا حلقہ سے الیکشن لڑیں گے۔
الیا س محمد تمبے نے بتایا کہ ملک انتہائی سنگین بحران سے گذر رہا ہے۔ بی جے پی حکومت کی ناقص معاشی پالیسیوں کے نتیجے میں ملک کی معیشت منہدم ہوگئی ہے۔ بے روزگاری عام ہے۔ جی ڈی پی گرتی جارہی ہے۔ ایندھن کی قیمتیں بے قابو ہورہی ہیں۔ اس کے نتیجے میں اشیاء ضروریہ کی قیمتیں آسمان چھورہی ہیں۔ ایل پی جی کی قیمتیں بھی دن بدن بڑھ رہی ہیں۔ پچھلے ایک مہینے میں ایل پی جی میں 125/-روپئے کا اضافہ ہوا ہے۔ سبسڈی بند ہوئے ایک سال ہوگیا ہے۔ جب ملک شدید قحط اور غربت کی طرف جارہا ہے تو نسل پرستی اور مذہبی منافرت پھیلاتے ہوئے عوام کو تقسیم کیا جارہا ہے۔ حکومت کی توجہ عوام کی فلاح و بہبودی کے بجائے کارپوریٹ کے فائدے پر لگی ہوئی ہے۔
انہوں نے بتایا کہ ایس ڈی پی آئی ایک ایسی پارٹی ہے جو ملک کو درپیش سنگیں بحران کے پیش نظر فاشزم کے خلاف لامحدود مزاحمت کیلئے پرعزم ہے۔ اسی دن جب بی جے پی حکومت نے شہریت بل پارلیمنٹ میں پیش کیا مقبول رہنما ڈاکٹر تسلیم احمد رحمانی نے بل پھاڑ کر شہریت قانون کے خلاف ملک میں احتجاج کی آواز بلند کی تھی اور وہ اب ملاپورم پارلیمانی حلقہ کے ضمنی الیکشن میں ایس ڈی پی آئی کے امیدوار ہیں۔ ان کو کامیاب کرنا حلقہ کے عوام کی ذمہ داری ہے۔ اس پریس کانفرنس میں ایس ڈی پی آئی ریاستی صدر عبدالمجید فیضی بھی وجود تھے۔