کنداپور23؍اپریل (ایس او نیوز) اپنی آنکھوں میں زندگی کے سہانے سپنے سجائے دو نوجوان طلباء جب کالج سے اپنے ہال ٹکٹ لے کر نکلے تھے تو انہیں پتہ نہیں تھا کہ راستے میں موت ان کا انتظار کررہی ہے۔ یہ دردناک کہانی کیرتن (19سال) اور سچن(19سال) نامی دو دوستوں کی ہے جنہوں نے کالج سے نکل کر گھر جانے سے پہلے کوٹیشور مندر کے سامنے واقع جھیل میں نہانے کا فیصلہ کیا اور دونوں ڈوب کر ہلاک ہوگئے۔

موصولہ رپورٹ کے مطابق یہ دونوں دوست کاگیری گورنمنٹ کالج کوٹیشور کے طالب علم تھے۔ کیرتن بی اے کے سال اول میں تھا اورسچن بی کام کے سال اول میں زیر تعلیم تھا۔کہاجاتا ہے کہ امتحان کی تیاریوں کے لئے کالج میں چھٹیاں چل رہی تھیں۔ کیرتن ، سچن اوران کے ایک اور دوست نے کالج پہنچ کر ہال ٹکٹ حاصل کرنے کے بعدکوٹیشور ٹیمپل جانے کا فیصلہ کیا۔ وہاں جھیل میں تیرنے کے لئے دو دوست پانی میں اترے جبکہ تیسرا دوست کنارے پر بیٹھا رہا۔ جب کافی دیر تک کیرتن اور سچن پانی سے باہر نہیں نکلے تو اس نے آس پاس کے لوگوں کو مطلع کیا۔فائر بریگیڈ عملے نے بڑی تلاشی کے بعد کیرتن کی لاش برآمد کرلی۔ سچن کی لاش کے لئے بڑے پیمانے پر تلاش جاری رہی۔کنداپور پولیس اسٹیشن کے انسپکٹر ہریش اور عملے نے جائے وقوع پر پہنچ کر جائزہ لیا اور معاملہ درج کرلیا۔اس المناک حادثے کی خبر عام ہوتے ہی مندر کی جھیل کے اطراف سینکڑوں لوگ جمع ہوگئے۔