بھٹکل 8/مئی (ایس او نیوز)  ادارہ ادب اطفال کی جانب سے بھٹکل میں گذشتہ دس روز سے جاری  شبینہ مکاتب کے بچوں کے درمیان کرکٹ ٹورنامنٹ  جمعرات کو اختتام کو پہنچ رہا ہے۔ اس انوکھے ٹورنامنٹ میں  شبینہ مکاتب کی چالیس ٹیمیں شریک ہوئی  تھیں جس میں سے چار ٹیمیں مسجد رحمانیہ شراالی،  عثمانیہ مسجد نوائط کالونی، مزمل مسجد اور ابوعُبیدہ مسجد سیمی فائنل میں داخل ہونے میں کامیاب ہوئیں۔

بدھ شام کو ملی اطلاع کے مطابق   پہلے سیمی فائنل میں  مسجد رحمانیہ شرالی نے عثمانیہ کو شکست دے کر فائنل میں رسائی حاصل کرلی ہے، جبکہ ٹورنامنٹ کا دوسرا سیمی فائنل  اور فائنل جمعرات کو کھیلا جائے گا۔

  ٹورنامنٹ کی دلچسپ بات یہ ہے کہ  میچس کے دوران کسی ٹیم کے کھلاڑی بدتمیزی  یا ایمپائرکے فیصلے کو قبول کرنے سے انکار کرتے ہیں  یا اس طرح کی کوئی غلط حرکت کرتے ہوئے پائے  جاتے ہیں تو   ٹیم کو  نیگیٹو  پوائنٹس دئے جاتے ہیں اور اگر کوئی ٹیم پانچ نیگیٹو پوانٹس حاصل کرتی ہے  تو پھر اُس  ٹیم  کو ٹورنامنٹ سے ہی خارج کرنے کا ایک  نیا  رول  متعارف کیا گیا  ہے۔ بچوں کے اخلاق کو بنانے، اُنہیں موبائل اور وڈیو گیمز    کے خول سے باہر نکالنے  کے  جس مقصد کے تحت  ادارہ ادب اطفال کام کررہاہے ، اُسی مقصد کے  تحت اس ٹورنامنٹ کو بھی  آرگنائز کیا گیا ہے۔ 

یہ جان کر حیرت ہوگی کہ  بچوں میں ڈسپلن پیدا کرنے اور اُن کے اخلاق کو سنوارنے کے مقصد سے  ادارہ کی جانب  سے منعقدہ پہلے اور بالکل انوکھےٹورنامنٹ میں  آرگنائزر نے  اب تک   پانچ ٹیموں کو  لیگ میچس کے دوران ہی پانچ نیگیٹیو پوانٹس  کی بنیاد  پر  ٹورنامنٹ سے باہر کردیا   اور ان  کے بدلے میں اُن پانچ  ٹیموں کو ٹورنامنٹ میں واپس کھیلنے کا موقع فراہم کیا   جن کی کارکردگی کھیل میں مایوس کن رہی تھی اور ٹورنامنٹ سے باہر جاچکی تھی،  مگرکھلاڑیوں نے  اچھی اور بہترین  ڈسپلن کا مظاہرہ پیش کیا تھا جس   پر اُنہیں ٹورنامنٹ میں  پھر ایک بار اپنے کھیل کا مظاہرہ  پیش کرنے کا موقع فراہم کیا گیا۔

ٹورنامنٹ میں ایک اور دلچسپ بات یہ ہے  کہ میدان کے  چہاروں جانب جہاں  کمپنیوں کے اور بزنس کو فروغ دینے والے  اشتہاری بینرس اویزاں  کئے جاتے ہیں، وہاں اسلامی  معلومات فراہم  کرنے والے بینرس لگائے گئے ہیں۔

  نوائط کالونی پھول میگزین کے دفتر سے متصل میدان میں منعقدہ پہلے  کرکٹ ٹورنامنٹ میں صرف  فراز والے علاقوں کی مساجد کے شبینہ مکاتب کے بچوں کو ٹورنامنٹ میں شریک ہونے کی دعوت دی گئی تھی۔ آٹھ کھلاڑیوں پر مشتمل ایک ٹیم  میں تین ایکسٹرا کھلاڑی   بھی رکھے گئے ہیں۔ ٹینس بال کے چھ اووروں کے اس ٹورنامنٹ میں دن میں چار میچس کھیلے جاتے  ہیں۔

ٹورنامنٹ کا آغاز28/اپریل کو ہوا تھا۔ ادارہ ادب اطفال کے صدر ڈاکٹرعبدالحمید اطہر رکن الدین ندوی،نائب صدر مولانا معظم ندوی، جنرل سکریٹری مولانا عبداللہ غازی دامدا ندوی،  مولانا  شہروز رکن الدین ندوی،  مولانا آفاق  محتشم ندوی،  مولانا مُقیت  دُرگا ندوی افتتاحی تقریب میں موجود تھے۔ ٹورنامنٹ کو آرگنائز کرنے میں نجم الثاقب بیہاٹی اور احمد افریکہ وغیرہ بھی پیش پیش تھے۔

بتاتے چلیں  کہ بھٹکل کی  جملہ مساجد میں بعد نماز مغرب چھوٹے بچوں کو قران اور قاعدہ پڑھانے کا نظم ہے، جسے شبینہ مکتب کہا جاتا ہے۔ ان مکاتب کے ذریعے عصری اسکولوں میں پڑھنے والے بچوں کو قران اور کلمہ کے ساتھ نمازکا طریقہ  سمیت  دین کی موٹے موٹے احکامات اور دین پر چلنے کے اداب سکھائے جاتے ہیں۔