ٹریوس ہیڈ اور ابھیشیک شرما کی جارحانہ اننگز کی بدولت حیدرآباد نے لکھنو کو 10 وکٹوں سےدی شکست
حیدرآباد، 9/مئی (ایس او نیوز /ایجنسی) ٹریوس ہیڈ (89) اور ابھیشیک شرما (75) کی جارحانہ نصف سنچریوں کی بنیاد پر سن رائزرز حیدرآباد نے انڈین پریمئر لیگ (آئی پی ایل) کے 57ویں میچ میں بدھ کے روز لکھنو سپر جائنٹس کو ریکارڈ 10 وکٹوں سے شکست دے دی۔ اس جیت کے ساتھ حیدرآباد پوائنٹس ٹیبل میں تیسرے مقام پر پہنچ گیا ہے۔ حیدرآباد کے اوپنرز ٹریوس ہیڈ اور ابھیشیک شرما نے آئی پی ایل کی تاریخ میں تیز ترین ہدف حاصل کرنے کا ریکارڈ بنایا۔ آئی پی ایل کی تاریخ میں پہلی بار اوپننگ جوڑی کے درمیان پہلی وکٹ کے لیے 167 رنز کی ریکارڈ شراکت ہوئی۔ ٹریوس ہیڈ نے 30 گیندوں پر آٹھ چوکوں اور آٹھ چھکوں کی مدد سے 89 رنز کی ناقابل شکست اننگز کھیلی۔ ان کے ساتھی ابھیشیک شرما نے 28 گیندوں میں آٹھ چوکے اور چھ چھکے لگا کر ناقابل شکست (75) رنز بنائے۔ حیدرآباد نے 9.4 اوور میں 167 رنز بنا کر 10 وکٹوں سے میچ جیت لیا۔ لکھنو کا کوئی بھی گیند باز وکٹ لینے میں ناکام رہا۔ اس سے قبل آیوش بدونی ناٹ آوٹ (55) اور نکولس پورن ناٹ آوٹ (48) کی اننگز کی بدولت لکھنو سپر جائنٹس نے سن رائزرز حیدرآباد کو جیت کے لیے 166 رنز کا ہدف دیا تھا۔ آج یہاں راجیو گاندھی انٹرنیشنل اسٹیڈیم میں لکھنو سپر جائنٹس کے کپتان کے ایل راہل نے ٹاس جیت کر پہلے بلے بازی کرنے کا فیصلہ کیا۔ بلے بازی کے لیے آنے والے لکھنو¿ کی شروعات سست اور خراب رہی۔ وہ تیسرے اوور میں کوئنٹن ڈی کاک (2) کی وکٹ گنوا بیٹھے۔ اس کے بعد مارکس اسٹونیس (3) پانچویں اوور میں 3 رنز بنانے کے بعد پویلین لوٹ گئے۔ کپتان کے ایل راہل اور کرونال پانڈیا نے اننگز کو سنبھالنے کی کوشش کی۔ 10ویں اوور میں پیٹ کمنز نے کے ایل راہل (29) کو نٹراجن کے ہاتھوں کیچ آوٹ کرا دیا۔ کرونال پانڈیا (24) 12ویں اوور میں رن آوٹ ہوگئے۔ اس کے بعد آیوش بدونی اور نکولس پورن نے اننگز کو سنبھالا۔ آیوش بدونی 30 گیندوں میں نو چوکوں کی مدد سے ناٹ آوٹ (55) رہے۔ وہیں نکولس پورن نے 26 گیندوں پر 48 رنز کی ناقابل شکست اننگز کھیلی، جس میں چھ چوکے اور ایک چھکا شامل تھا۔ دونوں کے درمیان پانچویں وکٹ کے لیے 99 رنز کی شراکت ہوئی۔ لکھنو سپر جائنٹس نے 20 اوورز میں چار وکٹوں کے نقصان پر 165 رنز بنائے۔ حیدرآباد کی جانب سے بھونیشور کمار نے دو وکٹیں حاصل کیں جبکہ پیٹ کمنز نے ایک بلے باز کو آوٹ کیا۔