بنگلورو، 9/مئی (ایس او نیوز /ایجنسی) جنسی اسکینڈل معاملے میں اغوا و تاوان کی دفعات کے تحت گرفتار جے ڈی ایس رکن اسمبلی ایچ ڈی ریونّا کو آج عدالت میں پیش کیا گیا۔ عدالت نے انہیں کوئی راحت نہ دیتے ہوئے 14 مئی تک عدالتی حراست میں بھیج دیا ہے۔ انہیں 4 مئی کو ایس آئی ٹی نے گرفتار کیا تھا اور آج (8 مئی) تک وہ ایس آئی ٹی کی تحویل میں تھے۔ انھیں عدالتی تحویل میں دیے جانے کے باوجواد اغوا معاملے میں ان سے تفتیش جاری رہے گی۔

واضح رہے کہ ایچ ڈی ریونّا اور ان کے ایک ساتھی ستیش ببنا کے خلاف کے آر نگر پولیس اسٹیشن میں 2 مئی کو اغوا کا معاملہ درج کیا گیا تھا جس کی بنیاد پر ایس آئی ٹی نے انہیں 4 مئی (ہفتہ) کو گرفتار کیا تھا۔ پولیس نے ایچ ڈی ریونّا اور ان کے ساتھی کے خلاف آئی پی سی کی دفعہ 364A (اغوا برائے تاوان)، 365 (نقصان پہنچانے کے ارادے سے اغوا) اور 34 (مشترکہ ارادے سے جرم) کے تحت مقدمہ درج کیا تھا۔ اپنی گرفتاری کے وقت ایچ ڈی ریونّا نے ضمانت کی درخواست دی تھی جسے عدالت نے مسترد کر دیا تھا۔ ایچ ڈی ریونّا اور ان کے ساتھی ستیش ببنّا کے خلاف 29 اپریل کو ایک خاتون کو اغوا کرنے کے الزام میں جمعرات کو یہ مقدمہ درج کیا گیا تھا۔

دوسری جانب ایچ ڈی ریونّا کے صاحبزادے اور کرناٹک سیکس اسکینڈل کے کلیدی ملزم پرجول ریونّا کے خلاف بھی پولیس کا شکنجہ کستا جا رہا ہے۔ ایس آئی ٹی نے ان کے خلاف بلیو کارنر نوٹس جاری کیا تھا، جس کا انٹرپول نے پیر (6 مئی) کو جواب دیا ہے۔ انٹرپول کے مطابق تمام 196 ممالک کو خبردار کر دیا گیا ہے کہ اگر پرجول ریونّا کو ان کے دائرۂ اختیار میں کسی بھی بندرگاہ پر دیکھا جاتا ہے تو ان کی پہچان کی جائے اور اطلاع دی جائے۔