بھٹکل،  9 / مئی (ایس او نیوز) لوک سبھا الیکشن کے تیسرے مرحلے میں اتر کنڑا سیٹ کے لئے ہوئے انتخاب میں بھٹکل تعلقہ کے جملہ 54,635 ووٹروں نے اپنا حق رائے دہی استعمال نہیں کیا ۔ 
    
الیکشن کے بعد موصول ہونے والی تفصیلات کے مطابق تعلقہ میں 2,27,706 ووٹرس میں سے 1,73,071 ووٹروں نے پولنگ میں حصہ لیا جس کے بعد یہاں پولنگ کی شرح 76.01 فی صد ریکارڈ کی گئی ۔ کسی بھی مقام پر کسی بھی قسم کی گڑبڑی اور الجھن کے بغیر ختم ہونے والی پولنگ میں فہرست میں موجود 1,15,172  مرد ووٹروں میں سے 85,124 افراد نے ووٹ دیا ۔ اسی طرح 1,12,534 خواتین ووٹروں میں سے 87,947 خواتین نے اپنا حق رائے دہی استعمال کیا ۔ اس طرح مردوں کے مقابلے میں عورتوں نے زیادہ تعداد میں پولنگ کی ۔ خیال رہے کہ گزشتہ اسمبلی الیکشن میں بھی پولنگ کرنے والوں میں خواتین کی تعداد ہی زیادہ تھی ۔
    
بھٹکل تعلقہ میں پولنگ کے لئے جملہ 248  بوتھس موجود تھے ۔ لوور پرائمری اسکول ہادور کے بوتھ میں سب سے زیادہ یعنی 89.73 فی صد پولنگ ہوئی ۔ جبکہ تکیہ اردو پرائمری اسکول(مغربی حصہ) میں صرف 60.29 فی صد پولنگ ریکارڈ کی گئی جو کہ سب سے کم پولنگ ہے ۔  تقریباً 78 سے زیادہ بوتھس میں 80 فی صد سے زیادہ پولنگ ہوئی اور ان میں زیادہ تر دیہی علاقوں کے بوتھس شامل ہیں ۔
    
یاد رہے کہ گزشتہ اسمبلی الیکشن کے موقع پر 129 پولنگ بوتھس میں 80 فی صد سے زیادہ اور 14 بوتھس میں 90 فی صد سے زیادہ پولنگ ریکارڈ کی گئی تھی ۔ اس طرح دیکھا جائے تو گزشتہ اسمبلی الیکشن کے مقابلے میں لوک سبھا الیکشن کے دوران پولنگ شرح کچھ کم ہی رہی ۔ البتہ گزشتہ لوک سبھا الیکشن کے مقابلے میں اس الیکشن کے دوران پولنگ شرح میں اضافہ دیکھا گیا ہے ۔