کیرالہ میں آر ایس ایس کارکن گرفتار، پوچھ تاچھ میں ہوئے حیرت انگیز انکشافات
منگلورو 23/جنوری (ایس او نیوز) پڑوسی ریاست کیرالہ کے کنور میں آر ایس ایس دفتر کے پاس واقع پولس پوسٹ پر بم پھینکے جانے کے الزام میں پولس نے آر ایس ایس کارکن کو گرفتار کرنے کی خبر موصول ہوئی ہے۔ ذرائع سے ملی اطلاع کے مطابق تمل ناڈو کے کوئمبٹور سے آر ایس ایس کا یہ ورکر بدھ کے روز گرفتار ہوا جس کے بعد اس سے سختی کے ساتھ پوچھ تاچھ کی گئی۔
میڈیا ذرائع کے مطابق آر ایس ایس کارکن کی شناخت پربھیش کی حیثیت سے کی گئی ہے، جس پر الزام ہے کہ 16جنوری کی رات میں ایک بجے کے قریب اس نے پولیس چوکی پر بم پھینکاتھا۔کیرالہ پولیس کے بیان کے مطابق گرفتاری کے بعداس نے اپنا جرم قبول کرلیا ہے۔اس سے ہوئی پوچھ تاچھ میں کئی حیران کرنے والے انکشافات ہوئے ہیں۔ بتایا جا رہا ہے کہ گرفتار آر ایس ایس کارکن نے پولس پوسٹ کو نشانہ بنا کر بم نہیں پھینکا تھا بلکہ آر ایس ایس دفتر کو ہی نشانہ بنایا تھا جو کہ غلطی سے پولس پوسٹ کی طرف چلا گیا۔ پولس کا کہنا ہے کہ گرفتار آر ایس ایس کارکن کا مقصد یہ تھا کہ وہ اپنی ہی تنظیم کے دفتر پر بم پھینکے اور اس کا الزام سی پی آئی ایم پر ڈال دے۔ لیکن معاملہ الٹا پڑ گیا اور غلطی سے بم پولس پوسٹ کی طرف چلا گیا۔
گرفتار آر ایس ایس کارکن سے مزید پوچھ تاچھ جاری ہے اور پولس اس بم اندازی کی جانچ ہر پہلو سے کر رہی ہے۔ پولس کے مطابق ملزم پر پہلے سے ہی پانچ معاملے زیر التوا ہیں۔ پولس کا یہ بھی کہنا ہے کہ واردات کے وقت ملزم نشے کی حالت میں تھا۔ پولس کو امید ہے کہ جانچ کے دوران مزید کئی انکشافات ہو سکتے ہیں۔