بھٹکل 18 جون (ایس او نیوز)مسقط سے گوا آنے کےدوران فلائٹ میں اچانک ایک بھٹکلی خاتون مسافر کی طبیعت بگڑ جانے سے فلائٹ کو ممبئی میں ہنگامی طور پر اُتارنا پڑا اورخاتون کو ائرپورٹ کے قریبی اسپتال لے جایا گیا جہاں اُس کی حالت مستحکم بتائی گئی ہے۔واقعہ اتوار صبح قریب ساڑھے چھ بجے پیش آیا۔
فلائٹ پر سواراس خاتون کے ساتھ ایک پانچ سالہ بچہ بھی تھا، اچانک فلائٹ میں خاتون جب بیمار پڑ گئی تو دیگر مسافروں کے ساتھ ایرلائن کا عملہ بھی پریشان ہوگیا، خاتون کی بگڑی حالت کو دیکھتے ہوئے فلائٹ کو ممبئی کی طرف موڑ دیا گیا اور ممبئی ائرپورٹ پر فلائٹ کی ایمرجنسی لینڈنگ کرائی گئی۔چونکہ اس فلائٹ میں خواتین اور بچوں کے بشمول بھٹکل کے قریب 15 دیگر مسافر بھی سوار تھے۔ اس لئے بھٹکل کی اس خاتون کے گھر والوں کا فوری پتہ لگالیا گیا اور فلائٹ کے ممبئی لینڈ کرتے ہی بھٹکل میں اُن کے گھروالوں کو خبر دی گئی۔ خاتون کو سہارا دینے کے لئے گوا اُترنے والا ایک بھٹکلی نوجوان بھی ممبئی میں ہی اُتر کر خاتون کو اسپتال لے جانے میں مدد کی۔ فلائٹ میں بھٹکل تعلقہ کے مرڈیشور سے تعلق رکھنے والے ایک معروف ڈاکٹربھی موجود تھے، جنہوں نے خاتون کو ابتدائی طبی امداد فراہم کی۔
اطلاع ملتے ہی بھٹکل مسلم جماعت ممبئی کے جنرل سکریٹری قمر الزماں موٹیا نے خاتون کے ساتھ ممبئی اُترنے والے نوجوان سے رابطہ کرکے جماعت کی طرف سے تعاون کی پیش کش کی۔ پتہ چلا ہے کہ خاتون کا بلڈ شوگر ڈاون ہوگیا تھا جس کی وجہ سے وہ فلائٹ میں بے ہوش ہوگئی تھی، مگر ممبئی اسپتال پہنچنے تک اُس کی طبیعت بحال ہوگئی۔ بتایا گیا ہے کہ وہ اب بالکل ٹھیک ہے۔
فلائٹ کے ایک مسافر نے بتایا کہ مسقط سے فلائٹ نے آدھی رات 2:40 کو اُڑان بھرا تھا۔ 7:10 کو گوا ائرپورٹ پر لینڈ کرنا تھا، مگر فلائٹ کو ممبئی میں ایمرجنسی لینڈنگ کرانے کی وجہ سے یہ فلائٹ صبح دس بجے گوا ائرپورٹ پر لینڈ ہوئی۔ اِس نے بتایا کہ بھٹکلی مسافروں کے ساتھ ساتھ فلائٹ پر موجود دیگر مسافر بھی خاتون کی بگڑی حالت دیکھ کر فکرمند ہوگئے تھے، سبھی لوگوں نے بھرپور تعاون پیش کیا۔