بیجنگ؍جنیوا؍نئی دہلی،12؍مارچ (ایس او نیوز؍یواین آئی) کورونا وائرس کی قہر کی وجہ سے ہندوستانی حکومت نے ملک میں آنے والے غیرملکیوں کے داخلے پر 15 اپریل تک پابندی لگادی ہے -اور تمام ویزے منسوخ کردئے ہیں - اس فیصلے پر 13 مارچ سے عمل شروع ہوگا -

مہاراشٹرا میں 10 افراد کے کورونا وائرس سے متاثرہونے کے بعد حکومت مزید مستعد ہوگئی ہے -

کلبرگی میں ایک مشتبہ معمرشخص کی موت نے انتظامیہ میں کھلبلی مچادی ہے - رپورٹ کا انتظار ہے اگر رپورٹ مثبت پائی جاتی ہے تو یہ کوروناوائرس سے ہونے والی موت ہندوستان میں پہلی موت ہوگی-

حالانکہ ریاستی وزیر صحت سری راملو نے کہا ہے کہ اس شخص کی موت عمررسیدگی کی وجہ سے ہوئی-

ہندوستان میں 68 افراد کوروناوائرس کی زد میں آچکے ہیں -ان لوگوں میں کیرلا کے وہ تین لوگ بھی شامل ہیں جنہیں علاج کے بعد چھٹی دے دی گئی تھی - کوروناوائرس کا قہر تھمنے کا نام نہیں لے رہا ہے لیکن اب بھی اس سے سب سے زیادہ متاثر چین کے لوگ ہی ہیں -

چین کے صوبہ ہبوئی کے دارالحکومت ووہان سے پاؤں پھیلانے والے اور جان لیوا کورونا وائرس کی زد میں دنیا کے104سے زیادہ ملک آ گئے ہیں اور اس سے مرنے والوں کی تعداد بڑھ کر4270ہو چکی ہے جبکہ129,118افراد اس وائرس سے زندگی اور موت کی جنگ لڑ رہے ہیں - اس وباء سے مرنے والے 80 فیصد لوگ 60سال سے زیادہ عمر کے تھے -فی الحال متاثرہ افراد کی کل تعداد سرکاری رپورٹوں سے کافی زیادہ ہونے کا امکان ہے اور اس وائرس سے متاثر ہونے کی وجہ سے چین میں کورونا وائرس سے اب تک3136افراد ہلاک جبکہ80,778لوگ متاثر ہوئے ہیں -

چین کے بعد اٹلی میں یہ جان لیوا وائرس مکمل طور پر اپنا پاؤں پھیلا چکا ہے - اٹلی میں کورونا وائرس کی وجہ سے اب تک631افراد کی موت ہو چکی ہے جبکہ 10149افراد اس سے متاثرہ ہوئے ہیں -عرب ممالک کے علاوہ ایران میں بھی پربامنڈل وائرس کا قہر جاری ہے -

ایران میں اس وائرس کی زد میں آنے سے291افراد کی موت ہو چکی ہے جبکہ 8042افراد اس وائرس سے متاثر ہیں -اٹلی اور ایران کے ساتھ جنوبی کوریا میں کورونا وائرس کے کیس میں اچانک اضافہ ہوا ہے - جنوبی کوریا میں کورونا سے اب تک54افراد کی موت ہو چکی ہے جبکہ7755لوگ اس متاثر ہیں -

چینی شہریوں کی اچھی خاصی آبادی والے ملک امریکہ میں بھی یہ پھیل چکا ہے - امریکہ میں کورونا وائرس سے اب تک28افراد کی موت ہو چکی ہے جبکہ959لوگ اس متاثرہ ہوئے ہیں - امریکہ کے نیویارک، واشنگٹن، کیلی فورنیا اور فلوریڈا سمیت 8ریاستوں میں کورونا وائرس انفیکشن کے پیش نظر ہیلتھ ایمرجنسی کا اعلان کر دیا گیا ہے -