اڈپی کے کوٹا پولیس اسٹیشن میں چئیترا کنداپورا کے خلاف داخل ہوئی ایک اور دھوکہ دہی شکایت
اڈپی 20 / ستمبر (ایس او نیوز) برہماور تعلقہ کے کوڈی کے رہنے والے سودین نامی شخص نے گووندا بابو کے ساتھ دھوکہ دہی سے کروڑوں روپے وصول کرنے والی چئیترا کنداپورا کے خلاف کوٹا پولیس اسٹیشن میں شکایت درج کروائی ہے کہ چئیترا نے اس سے پانچ لاکھ روپے حاصل کیے تھے اور رقم واپس مانگنے پر وہ سودین کے خلاف عصمت دری کا کیس داخل کرنے کی دھمکی دے رہی ہے ۔
سودین کی طرف سے درج کی گئی شکایت کے مطابق چِئیترا کنداپورا نے سودین سے پانچ لاکھ روپے اس وعدے کے ساتھ وصول کیے تھے کہ وہ اس کے لئے کپڑوں دکان کھولنے کا انتظام کرے گی ۔ سودین کا کہنا ہے کہ اس نے چئیترا کے وعدے پر یقین کرتے ہوئے اپنی جمع پونجی اس کے حوالے کی تھی ۔ مگر چئیترا نے نہ دکان کھولنے کا کام کیا اور نہ ہی اس کی رقم واپس لوٹا ئی ۔ جب سودین نے اس سے رقم لوٹانے کا مطالبہ کیا تو چئیترا نے اسے دھمکی دی کہ اگر وہ پولیس کے پاس شکایت درج کروائے گا تو پھر وہ اس کے خلاف عصمت دری کا معاملہ درج کروائے گی ۔
سودین کا کہنا ہے کہ وہ اور اس کے گھر والے چئیترا کی دھمکی سے ڈر گئے تھے اور یہ مان کر خاموش ہوگئے تھے کہ اس کے پاپ کا انجام اسے ضرور ملے گا ۔
اب اسمبلی ٹکٹ دلانے کے نام پر گووندا بابو نامی تاجر کے ساتھ کروڑوں روپے کی دھوکہ دہی معاملے میں چئیترا گینگ کی گرفتاری کے بعد سودین نے بھی ہمت دکھائی ہے اور چئیترا کے خلاف پولیس کے پاس شکایت درج کروائی ہے ۔ اس کے علاوہ اس نے چئیترا کنداپورا کے ذریعے ٹھگے گئے دوسرے افراد سے بھی درخواست کی ہے کہ وہ بھی آگے آئیں اور پولیس کے پاس ایسے معاملات کی شکایت درج کروائیں ۔
