فلسطین پر اسرائیل کے وحشیانہ حملوں کے تعلق سے منکال وئیدیا کا تبصرہ ؛ وزیر اعظم ایک سمت میں ہیں تو ساحلی اضلاع کی بی جے پی دوسری سمت میں ہے ۔
بھٹکل21 / نومبر ( ایس او نیوز) حال ہی میں بھٹکل کے مرکزی ادارے مجلس اصلاح و تنظیم نے فلسطین کی حمایت میں جو خاموش احتجاجی مظاہرا کیا تھا اس کے خلاف بی جے پی اتر کنڑا ضلع یونٹ کی طرف سے اخباری بیان جاری کیا گیا تھا ۔ اس بارے میں جب ضلع انچارج وزیر منکال وئیدیا سے پوچھا گیا تو انہوں نے کہا کہ وزیر اعظم نریندر مودی ایک سمت میں کھڑے ہیں تو ساحلی اضلاع کی بی جے پی دوسری سمت میں ہونے جیسی صورتحال پیدا ہوئی ہے ۔
منکال وئیدیا نے کہا کہ ایک طرف مرکزی حکومت فلسطین کی حمایت میں کھڑی ہے تو ضلع اتر کنڑا کی بی جے پی کسی اور ہی دنیا میں رہتی ہے ۔ پورے ملک کی بی جے پی ایک طرف ہے تو ساحلی علاقے کے بی جے پی والے دوسری ہی طرف ہیں ۔ ہر بھارتی باشندے کی خواہش ہے کہ پوری دنیا میں امن قائم ہونا چاہیے ۔ جب معصوم لوگ مارے جا رہے ہیں ، تو ایسی صورت میں متاثرین کی حمایت میں کھڑے ہونا ، ان کے ساتھ اظہار ہمدردی کرنا کسی بھی طرح سے غلط نہیں ہے۔ انہوں نے بی جے پی پر طنز کستے ہوئے کہا کہ کچھ لوگوں کو دہی میں کنکر ڈھونڈنے کی عادت لگی ہے ۔ اسے سدھارا نہیں جا سکتا ۔
