کرناٹک میں پہلے مرحلہ میں تقریباً 70 فیصد پرامن پولنگ، راجدھانی بنگلورو کی تینوں سیٹوں پر پولنگ 50 فیصد تک محدودرہ گئی
بنگلورو، 27/ اپریل (ایس او نیوز ) کرناٹک میں پہلے مرحلہ کے لوک سبھا انتخابات میں 14 لوک سبھا حلقوں میں پولنگ اکا دکا وارداتوں کو چھوڑ کر پر امن رہی۔ چامراج نگر میں پتھراؤ، بعض مقامات پر پولنگ کا بائیکاٹ اور احتجاج کو چھوڑ کر بیشتر مقامات پر پولنگ انتہائی پر سکون رہی۔ صبح سے ہی لوگوں میں اپنے نمائندوں کو منتخب کرنے کا جوش و خروش دیکھا گیا۔ بجز بنگلورو کے تین حلقوں کے ریاست بھر میں پولنگ کا اوسط بہتر رہا جبکہ بنگلورو کے تینوں حلقوں سنٹرل ، ساؤتھ اور نارتھ میں ووٹنگ کا اوسط 50 فیصد کو عبور نہ کر سکا۔ سب سے کم پولنگ بنگلور و سنٹرل حلقے میں 48.61 فیصد رہی۔ ریاست میں سب سے زیادہ پولنگ منڈ یا حلقہ میں ہوئی جہاں سابق وزیر اعلیٰ ایچ ڈی کمار سوامی جنتا دل (ایس) ، بی جے پی اتحاد سے امیدوار ہیں تو ان کے مقابل کانگریس سے اسٹار چند رو میدان میں ہیں ۔ اُڈ پی۔ چکمگلورو میں 76.06 فیصد، ہاسن میں 77.51 فیصد، دکشن کنڑا میں 77.43 فیصد، چتر درگہ میں 73.11 فیصد ٹمکورو میں 77.70 فیصد، منڈیا میں سب سے زیادہ 81.48 ،میسورو 70.45 ،چامراج نگر 76.59 ،بنگلورو رورل 67.29 ،بنگلورو نارتھ 54.42، بنگلور و سنٹرل سب سے کم 52.81 ،بنگلورو ساؤتھ 53.15، چکبالاپور 76.82 ،کولار 78.07 فیصد پولنگ ریکارڈ کی گئی۔
مسلم علاقوں میں زوردار ووٹنگ: شہر بنگلورو کے بیشتر مسلم علاقوں میں ووٹنگ کرنے کیلئے غیر معمولی جوش و خروش دیکھا گیا اور سرسری اندازے کے مطابق بنگلورو کے تینوں حلقوں میں مسلم ووٹنگ کا اوسط لگ بھگ 70 تا 72 فیصد کے آس پاس رہا ہے۔ صبح سے ہی پولنگ بوتھوں میں بھیڑ دیکھی گئی اور دو پہر تک بیشتر مسلم محلوں کے پولنگ بوتھوں میں 50 فیصد تک پولنگ ہو چکی تھی۔ شیواجی نگر ، چامراج پیٹ ، شانتی نگر سر و گنا نگر اور دیگر حلقوں میں مسلم ووٹروں نے بڑھ چڑھ کر ووٹنگ میں حصہ لیا۔ اسی طرح بنگلورو نارتھ کے پلکیشی نگر، بیا ٹرائن پورا اور ہیبال اسمبلی حلقوں میں آنے والے پولنگ بوتھس پر بڑی تعداد میں مسلم ووٹروں بالخصوص برقعہ پوش خواتین کی قطاریں دیکھی گئیں۔ بعض مقامات پر ووٹنگ مشینوں میں تکنیکی خرابی کے سبب کچھ دیر کیلئے پولنگ کے عمل کو روک دینا پڑا۔ ووٹنگ مشینوں کے بٹن کافی سخت ہونے کی شکایت عام رہی۔ تاہم وہاں موجود پولنگ اور سکیورٹی عملہ نے اس معاملہ میں ووٹروں کی رہنمائی کی۔ پولنگ کیلئے غیر معمولی حفاظتی انتظامات کئے گئے تھے۔ تاہم کہیں سے کوئی نا خوشگوار واقعہ کی خبر نہیں ملی ۔