بھٹکل میں ہوم کورنٹائن کے باوجود گھر سے باہر نکلنے اور کورونا کرفیو کی خلاف ورزی کرنے پر ایک شخص کے خلاف پولس تھانہ میں معاملہ درج
بھٹکل6/اپریل (ایس اونیوز) کورونا کورنٹائن کی خلاف ورزی کرنے کے الزام میں بھٹکل ٹاون پولس تھانہ میں ایک شخص کے خلاف معاملہ درج کیا گیا ہے۔
اطلاع کے مطابق تعلقہ کے فاروقی اسٹریٹ کے شمس الدین نوید مولیٰ کھنڈی (36) مارچ 17 کو دبئی سے بھٹکل پہنچا تھا، 3/اپریل کو وہ پیٹ میں درد ہونے کی شکایت لے کر بھٹکل تعلقہ (سرکاری) اسپتال پہنچا تھا جہاں ڈاکٹروں نے اس کی جانچ کرنے کے بعد اُسے 16/اپریل تک 14 دنوں کے لئے ہوم کورنٹائن میں رہنے کی ہدایت دی تھی اور سختی کےساتھ کہا تھا کہ وہ گھر سے باہر نہ نکلے۔ مگر الزام ہے کہ اس نے 4/اپریل کو ہوم کورنٹائن سے باہر نکل کر بھٹکل میں عائد کورونا کرفیو کی بھی خلاف ورزی کی اور عوامی جگہ پر گھومتا ہوا پایا گیا۔ اس تعلق سے تعلقہ ہیلتھ آفسر ڈاکٹر مورتھی بھٹ نے پولس تھانہ میں شکایت درج کی ہے۔
خبر ملی ہے کہ اُسے فوری طور پر گھر کے کورنٹائن سے نکال کر اب بھٹکل سرکاری اسپتال کے کمرے میں کورنٹائن میں رکھا گیا ہے۔