بھٹکل میں کار اور لاری کے درمیان ٹکر؛ ایک ہلاک، تین شدید زخمی
بھٹکل 10/ستمبر (ایس او نیوز) تعلقہ کے مرڈیشور ۔بستی نیشنل ہائی وے 66 پر ہوئے ایک سڑک حادثے میں ایک شخص ہلاک ہوگیا جبکہ دیگر تین شدید زخمی ہوگئے۔ حادثہ اتوار کی دوپہر اُس وقت پیش آیا جب ان کی کار مخالف سمت سے آنے والی مچھلیوں سے بھری لاری سے تیز رفتاری کے ساتھ ٹکراگئی۔
ٹکر اتنی شدید تھی کہ ٹکر لگتے ہی کار کے پرخچے اُڑ گئے ، جبکہ کار کے اندر سوار چاروں لوگ بھی حادثے میں بہت بری طرح زخمی ہوگئے۔ چاروں کو فوری طور پر قریبی آر این ایس اسپتال لے جایا گیا، مگر ایک شخص جس کی شناخت بھاسکر (70) کی حیثیت سے کی گئی ہے، اسپتال لے جانے تک دم توڑ دیا۔ حادثے میں دیگر تین لوگوں کو بھی کافی چوٹیں آئی ہیں جن میں دو کی حالت نازک بتائی گئی ہے۔ زخمیوں کی شناخت شریش (34) ,رویندرن (65) اور اسنیجو (40)کی حیثیت سے کی گئی ہے. ان سبھی کا تعلق پڑوسی ریاست کیرالہ کے کنّور کے تلچری سے ہے۔ یہ لوگ کلّور اور مرڈیشور میں سیاحت کے بعد اور مندروں کے درشن کے بعد واپس کیرالہ جانے کے لئے روانہ ہوئے تھے، مگر کیرالہ سے انکولہ جانے والی مچھلیوں سے بھری لاری سے ان کی کار ٹکراگئی۔
شدید طور پر زخمی لوگوں کو مرڈیشور میں ابتدائی طبی امداد کے بعد کنداپور روانہ کیا گیا ہے۔
مرڈیشور پولس تھانہ میں معاملہ درج کیا گیا ہے اور پولس نے لاری ڈرائیور منجوناتھ کو اپنی تحویل میں لے لیا ہے۔مزید چھان بین جاری ہے۔