مسقط 12/مئی (ایس او نیوز) بھٹکل مسلم اسوسی ایشن مسقط کی طرف سے  عمان میں مقیم بھٹکلی حضرات  کے لئے عید الفطر کے موقع پر ایک گیٹ ٹوگیدر پروگرام مسقط کے رویل  ہاوس  مطرح کورنیش میں منعقد کیا گیا  جس میں جماعت کے اراکین نے کثیر تعداد میں شرکت کرتے ہوئے  ایک   دوسرے کو عید کی مبارکبادیاں  پیش کیں۔ 

بھٹکل کی طرح مسقط سمیت پورے گلف میں 2  مئی کو عید الفطر منائی گئی تھی، اسی مناسبت سے   جماعت کے تمام اراکین کے لئےاُسی شام   مطرح کورنیش پر ایک پر تکلف  عشائیہ  کا انعقاد کیا گیا تھا اور عمان میں مقیم   بھٹکلی حضرات کو    مدعو کیا گیا تھا۔ جماعت کے  صدر جناب    ایم جے نثار نے بتایا کہ  تقریب میں جماعت کے تقریباً تمام اراکین مع فیمیلس سمیت دبئی سے آئے ہوئے    مہمانان بھی  شریک   ہوئے   ۔ تقریب میں  شریک حضرات کو  ایک دوسرے کے ساتھ تبادلہ خیال کا اچھا  موقع ملا۔

جماعت کے سرپرست جناب ایس یم سید شکیل نے بتایا کہ   بھٹکل کے حضرات جہاں بھی مقیم ہوتے ہیں، وہاں اپنی ایک جماعت ضرور قائم کرتے ہیں اور ایک دوسرے کے ساتھ مل جل کر رہنا پسند کرتے ہیں، مزید کہا کہ یہی بھٹکلی لوگوں کی اہم خصوصیت ہے، ہم ایک دوسرے کے ساتھ مل جل کر رہنا پسند کرتے ہیں، ہر کام ایک دوسرے کے ساتھ مشورہ کرکے کرتے ہیں۔ انہوں نے کہا کہ اتحاد میں طاقت ہے اور مسلمانوں کے لئے ضروری ہے کہ وہ متحد ہو کر رہیں۔ قرآن مجید کا حوالہ دیتے ہوئے انہوں نے بتایا کہ قران میں  جابجا اجتماعیت اور جماعت کی اہمیت سمجھائی گئی ہے۔ ایک ساتھ رہنے، مل جل کر رہنے، شیر و شکر بنے رہنے پر زور دیا گیاہے اسی طرح  تفرقہ و انتشار سے بچنے اور اس سے  دور رہنے کی  بھی تلقین کی گئی ہے۔

اس موقع پرقائم مقام سکریٹری ابوالاعلیٰ محتشم،   ایس ایم سید شعور، سعدا محمد سلیم   دیگر اراکین انتظامیہ اور کئی  ذمہ داران   وغیرہ موجود  تھے۔سکریٹری ابوالاعلیٰ نے بتایا کہ  رات کے پروگرام سے قبل  عید الفطر کی دوگانہ ادا کرنے کے فوری بعد جماعت کے سرگرم رکن  فوزان محتشم کی رہائش گاہ پر بھی جماعت کے اراکین کے لئے ایک  خوبصورت  گیٹ ٹوگیدر کا  انعقاد  کیا گیا  تھا اور کثیر تعداد میں مسقط میں مقیم بھٹکلی حضرات نے شرکت کی تھی۔