بھٹکل،6 / اپریل (ایس او نیوز) بھٹکل - ہوناور اسمبلی حلقہ کی کچھ اہم خصوصیات کا جائزہ لیں تو 1957 سے آج تک کسی بھی خاتون امیدوار کو انتخاب جیتنے میں کامیابی نہیں ملی ہے ۔ دوسری اہم بات یہ ہے کہ 1999 سے اب تک کوئی بھی امیدوار ایسا نہیں ہے جس نے دوبارہ اس حلقہ سے انتخاب جیتا ہو ۔ 
    
خیال رہے کہ آزادی کے بعد جو دو عام انتخابات ہوئے اس میں بھٹکل کا علاقہ ہوناور اسمبلی حلقہ میں شامل تھا ۔ پھر 1967 میں ہوناور کا نصف حصہ بھٹکل کے ساتھ شامل کرکے اسے بھٹکل - ہوناور حلقہ قرار دیا گیا ۔ بھٹکل اسمبلی حلقہ ایک ایسا علاقہ ہے جہاں سے کانگریس پارٹی کو  انتخابات میں سب سے زیادہ مرتبہ جیت حاصل ہوئی ہے ۔
    
1957 کے بعد سے اب تک جتنے بھی انتخابات ہوئے ہیں ان میں جیتنے والوں کی فہرست کچھ اس طرح ہے :
    
    سال جیتنے والا امیدوار پارٹی          

    1957    جوکاکو شمس الدین     انڈین نیشنل کانگریس             
    1962    جوکاکو شمس الدین     انڈین نیشنل کانگریس         
    1964     آر ایس ہیگڈے     آزاد          
    1967    منجوناتھ جالی ستگی    پرجا سوشلسٹ پارٹی(پی ایس پی)             
    1972    ایس ایم یحییٰ        انڈین نیشنل کانگریس                 
    1978    ایس ایم یحییٰ        انڈین نیشنل کانگریس(آئی)         
    1983    آر این نائک         جنتا پارٹی             
    1985    آر این نائک        انڈین نیشنل کانگریس         
    1989    آر این نائک         انڈین نیشنل کانگریس         
    1994    ڈاکٹر یو چترنجن    بی جے پی             
    1996    شیوا نند نائک        بی جےپی 
    1999    جے ڈی نائک     انڈین نیشنل کانگریس
    2004    شیوا نند نائک     بی جے پی 
    2008    جے ڈی نائک      انڈین نیشنل کانگریس
    2013    منکال وئیدیا        آزاد
    2018    سنیل نائک         بی جے پی 

اوپر کے جائزے سے پتہ چلتا ہے کہ اس حلقہ سے صرف ایڈوکیٹ آر این نائک ہی ایسے امیدوار رہے ہیں جنہوں نے مسلسل تین مرتبہ انتخاب جیت کر ہیٹ ٹرک اپنے نام کی ہے اور آج تک ان کا یہ ریکارڈ برقرار ہے ۔ جبکہ 1999 سے قبل دو مرتبہ الیکشن جیتنے والوں کی فہرست میں جناب جوکاکو شمس الدین ، جناب ایس ایم یحییٰ اور شیوانند نائک کے نام شامل ہیں ۔ جہاں کانگریس ، پرجا سوشلسٹ پارٹی، بی جے پی  کے امیدواروں نے جیت درج کی ہے وہیں پر کسی سیاسی پارٹی سے وابستگی کے بغیرآزاد امیدوار کے طور پر دو افراد نے الیکشن جیتا ہے ۔ 
    
حالانکہ آج تک اس حلقہ سے کسی خاتون امیدوار نے انتخاب نہیں جیتا ہے مگر 1964 میں پرجا سوشلسٹ پارٹی سے سیتا بائی واسو دیو نائک، 1994 میں کانگریس سے لکشمی منجپّا نائک ، سماج وادی پارٹی سے للیتا ہیگڈے وغیرہ نے الیکشن لڑا ہے مگر انہیں کامیابی نہیں ملی ۔ 
    
امسال عآپ اور ایس ڈی پی آئی کے امیدوار پہلی مرتبہ اس حلقے سے مقابلے پر اترنے والے ہیں ۔ کانگریس، جنتا دل اور بی جے پی کے امیدواروں میں عوام کی نظر بنی ہوئی ہے مگر سیاسی جانکار کہتے ہیں کہ اس مرتبہ کانگریس اور بی جے پی کے درمیان راست اور کڑا مقابلہ ہونے والا ہے ۔