جدہ 28 اگست (ایس او نیوز)  بھٹکل مسلم کمیونٹی جدہ کا سالانہ اجلاس جمعرات مورخہ  26 اگست کو  جدہ کے گرین لینڈ  ہوٹل میں منعقد ہوا جس میں  جدہ جماعت سمیت بھٹکل مسلم خلیج کونسل کے سابق صدر مرحوم  سی اے زاہد رکن الدین صاحب کے  تعلق سے موصولہ تعزیتی قرار دادوں  اور تعزیتی خطوط پر مشتمل ایک کتاب "مرحوم زاہد رکن الدین، ایک فرد  ایک انجمن "  کا بھی اجراء عمل میں آیا۔ بتایا گیا ہے کہ اس کتاب میں بھٹکل کی مختلف جماعتوں اور مختلف اداروں سمیت  مرحوم زاہد صاحب کے رشتہ داروں اور دوست احباب  کی طرف سے موصول ہونے والی  تعزیتی قراردادوں  اور  تعزیتی پیغامات   کو شامل کرتے ہوئے مرحوم کوزبردست  خراج عقیدت پیش کیا گیا ہے اور ان کی خدمات کا اعتراف کیا گیا ہے۔ کتاب کا اجراء جماعت کے سنئیر رکن اور مرحوم زاہد کے  خاص دوست جناب  عبدالرزاق قاضیاء  کے ہاتھوں کیا گیا۔

جلسے کا آغاز عبداللہ ابن وسیم سدی باپا کی تلاوت کلام پاک سے ہوا، سکریٹری عبد المعز جوکاکو نے استقبال کیا، سالانہ  کارکردگی کی رپورٹ  جماعت کے جنرل سکریٹری نوید حسن ائیکری نے پیش کیا،  محاسب محمد  عدنان رکن الدین نے  اکاونٹ اور بجٹ پیش کیا،  جماعت کی  سیف اسکیم کے مینجنگ ڈائرکٹر  نعمان علی اکبرا نے بچت اسکیم کی رپورٹ اور حساب کتاب پیش کیا۔ سالانہ رپورٹ اور حساب وکتاب کی پیشی کے بعد ممبران کو سوالات کا موقع دیا گیا تھا اور اطمینان بخش جوابات کے بعد رپورٹوں کو منظوری دی گئی۔  اس موقع پر جماعت کے اگلے  انتخابات کے لئے  محمد عدنان رکن الدین کو الیکشن کمشنر کی ذمہ داری  سونپی گئی، جنہوں نے  انتخابات کے تعلق سے رولس اینڈ ریگولیشن سمیت اہم اُمور کی طرف ممبران کی توجہ مبذول کرائی۔

جماعت کے صدر جناب عبدالسلام دامدا نے  اجلاس کی صدارت فرمائی۔دُعا کے بعدجلسہ برخواست ہوا۔ پروگرام کی نظامت جماعت کے فائنانس سکریٹری عبیداللہ عسکری کررہے تھے۔