بھٹکل میں بقر عید کے پیش نظر پیس میٹنگ کا انعقاد؛ کورونا کی تیسری لہر کے خدشہ کو نظر میں رکھتے ہوئے تہوار منانے اسسٹنٹ کمشنر کی اپیل
بھٹکل 20 جولائی (ایس او نیوز) بھٹکل سمیت ملک بھر میں 21 جولائی کو عیدالاضحیٰ منائی جارہی ہے، جس کو دیکھتے ہوئے بھٹکل میں امن و امان کے ساتھ عید منانے اور تمام مذاہب کے لوگوں کے ساتھ امن اور بھائی چارگی کو بحال رکھتے ہوئے تہوار منانے کی غرض سے ہر بار کی طرح اس بار بھی عید سے دو روز قبل یعنی پیر کو اسسٹنٹ کمشنر دفتر میں اے سی ممتا دیوی کی صدارت میں پیس میٹنگ کا انعقاد کیا گیا جس میں مسلم ذمہ داران کے ساتھ ساتھ غیر مسلم ذمہ داران نے بھی شرکت کی۔
اس موقع پر گفتگو کرتے ہوئے اسسٹنٹ کمشنر ممتا دیوی نے مسلمانوں سے اپیل کی کہ وہ کووِڈ کی تیسری لہر کے خدشہ کو دیکھتے ہوئے ہر ممکن احتیاط برتیں اور کورونا کی جو ہدایات سرکار کی طرف سے جاری کی گئی ہیں، اُس پر سختی کے ساتھ عمل کرتے ہوئے عید کا تہوار منائیں۔ انہوں نے کہا کہ عید کے نام پر بچوں کو گھر وں سے باہر لے جانے میں احتیاط برتیں۔ بھٹکل ڈی وائی ایس پی بیلی ایپّا نے بات کرتے ہوئے عوام سے اپیل کی کہ وہ تہوار کے موقع پر چھوٹی چھوٹی باتوں کو طول دینے سے گریز کریں، کسی بھی طرح کے معاملات پیش آنے کی صورت میں ذمہ داران خود مداخلت کرتے ہوئے اُس کو آپسی بات چیت کے ذریعے حل کرنے کی کوشش کریں، انہوں نے ذمہ داران سے اپیل کی کہ کوئی بھی واقعہ پیش آنے کی صورت میں فور ی پولس کو خبرکریں اور ماحول کو خراب کرنے کی کسی بھی کوشش کو ناکام بنانے میں انتظامیہ کا ساتھ دیں۔ سرکل پولس انسپکٹر دیواکر نے گفتگو کرتے ہوئے کہا کہ سوشیل میڈیا میں اگر کوئی امن کو خراب کرنے والے پیغامات یا فوٹوز پوسٹ کرتاہے تو اُن کے خلاف سخت کاروائی کی جائے گی۔
مسلم کمیونٹی کی نمائندگی کرتے ہوئے عنایت اللہ شاہ بندری نے میونسپل حکام پر صاف صفائی کی طرف توجہ دینے اور محکمہ ہیسکام پر الیکٹری سٹی کی بحالی کی طرف توجہ دلائی۔ انہوں نے کہا کہ تنظیم کی طرف سے قربانی کے جانوروں کی ہڈیاں اور فضلا وغیرہ کو ٹھکانے لگانے کے لئے سواریوں کا انتظام کیا گیا ہے، تنظیم کے والنٹیرس ہر سال کی طرح امسال بھی اپنی خدمات پیش کریں گے، انہوں نے حکام سے درخواست کی کہ انتظامیہ اگر تنظیم کے ساتھ تعاون کریں تو آپسی تال میل سے ہر طرح کے حالات بہتر انداز میں نپٹائے جاسکتے ہیں، انہوں نے سرکاری اہلکاروں سے تنظیم کے ساتھ تعاون کرنے کی درخواست کی۔
تحصیلدار ایس روی چندرا، بھٹکل میونسپل چیف آفسر رادھیکا، پی ایس آئی سُوما، بھرت، ہنومنتا کُڈگونٹی، وشو ہندو پریشد کے شنکر شٹی، مجلس اصلاح و تنظیم کے صدر ایس ایم پرویز، جنرل سکریٹری عبدالرقیب ایم جے ندوی، بھٹکل مسلم یوتھ فیڈریشن کے صدر عزیز الرحمٰن رکن الدین ندوی، چن پٹن شری ہنومنت دیوستھان کمیٹی کے صدر شری دھر موگیر، تعلقہ پنچایت کے سابق صدر پرمیشور دیواڑیگا، شانتا رام، شری پد کنچوگار، محی الدین الطاف کھروری، ایڈوکیٹ عمران لنکا، سمیت کافی دیگر ذمہ داران موجود تھے۔.