بھٹکل : بنگلور کا ایک سیاح مرڈیشور سمندر میں غرق ہوکر ہلاک؛ چار دیگر کو بچالیا گیا
بھٹکل 22/ستمبر (ایس او نیوز) بحرعرب میں غرق ہوکر بنگلور کا ایک سیاح ہلاک ہوگیا، البتہ اُس کے چار دیگر دوستوں کو مقامی ماہی گیر بچانے میں کامیاب ہوگئے، یہ واردات آج اتوار صبح سیاحتی مقام مرڈیشور میں پیش آئی۔
پولس ذرائع نے بتایا کہ بنگلور سے گیارہ لوگوں کی ایک ٹیم آج صبح قریب سات بجے مرڈیشور پہنچی تھی جس میں سے بعض لوگ سمندری لہروں کا لطف اُٹھاتے اُٹھاتے نہانے کے لئے سمندر میں اُتر گئے۔ اس دوران سمندری لہروں کی زد میں آکر پانچ سیاح غوطے کھاتے ہوئے ڈوبنے لگے تو موقع پر موجود مقامی لوگ اور ماہی گیر فوراً ان کی مدد کو پہنچ گئے اور سبھی پانچوں کو سمندر سے باہر نکالتے ہوئے کنارے لے آئے، مگر اس میں سے ایک شخص جو کافی غوطے کھا چکا تھا، پیٹ میں کافی مقدار میں پانی پہنچ جانے سے حالت بے حد خراب ہوگئی ، اُسے فوری طور پر آر این ایس اسپتال لے جایا گیا، مگر علاج کارگر نہ ہوسکا اور وہ کچھ ہی دیر بعد چل بسا۔ پولس ذرائع نے بتایا کہ دیگر چاروں لوگ محفوظ ہیں۔
مرنے والے کی شناخت بنگلور ملیشورم کے رہنے والے راجیو نٹراج (27) کی حیثیت سے کی گئی ہے۔ نعش کو پوسٹ مارٹم کے لئے سرکاری اسپتال لے جایا گیا ہے۔
خیال رہے کہ اتوار کو چھٹی ہونے کی بناء پر کثیر تعداد میں سیاح مرڈیشور پہنچتے ہیں، چونکہ سوئمنگ پول اور سمندر کی تیراکی بے حد مختلف ہوتی ہے، اور سمندر میں اُونچی اُٹھتی لہروں کا مقابلہ کرتے ہوئے تیراکی کرنا آسان نہیں ہوتا،شہروں کے اکثر لوگ جو سوئمنگ پول میں تیراکی کرنا جانتے ہیں، سمندر میں بھی تیراکی کو آسان سمجھتے ہوئے اُتر جاتے ہیں، اسی زعم میں اکثر لوگ سمندر کی اونچی اُٹھتی لہروں کی زد میں آکر غوطے کھانے لگتے ہیں اور غرق ہوکر ہلاک ہوجاتے ہیں۔
واضح رہے کہ مرڈیشور سمندر میں ہر ماہ کم ازکم ایک سیاح سمندر میں غرق ہوکر ہلاک ہونے کی واردات پیش آتی رہتی ہے، حالانکہ بیچ پر ہی بڑا بورڈ بھی آویزاں کیا گیا ہے کہ یہاں پر تیرنا منع ہے اور بے حد خطرناک ہے۔
