کوزی کوڈ، 16/ستمبر (ایس او نیوز/ایجنسی ) کیرالہ کی وزیر صحت وینا جارج نے نپاہ وائرس کے تعلق سے خبر دی ہے کہ  کوزی کوڈ یا کالی کٹ  میں ایک اور معاملہ کی تصدیق ہوئی ہے اس طرح نپاہ وائرس سے متاثرہ مریضوں  کی تعداد بڑھ کر چھ ہوگئی ہے۔البتہ انہوں نے یہ بھی بتایا کہ نپاہ ٹیسٹ کے لیے بھیجے گئے 11 نمونوں کے نتائج منفی بھی آئے ہیں۔

وزیر صحت کے مطابق کیرالہ کے کوزی کوڈ میں   جمعہ تک جملہ   6 مریضوں کے نپاہ نمونوں کی نتائج مثبت آئے ہیں، اُس کے بعد کوئی نیا کیس سامنے نہیں آیا ہے۔ان کی فراہم کردہ اطلاع کے مطابق  اب میڈیکل کالج میں 21 افراد  کو آئسولیشن(یعنی الگ تھلگ ) رکھا گیا ہے ۔ انہوں نے بتایا کہ  ہماری موجودہ ترجیح ان لوگوں کا پتہ لگانا ہے جو آخری شخص کے ساتھ رابطے میں آئے جس کا ٹیسٹ مثبت آیا ہے۔ اس کے ساتھ ساتھ ہم پہلے کیس کے ماخذ کی نشاندہی کرنے کی بھی کوشش کر رہے ہیں۔ وہ شخص جس کی موت گزشتہ ماہ ہوئی تھی۔ ہم نے پولیس سے اس کے موبائل ٹاور کی لوکیشن فراہم کرنے کی درخواست کی ہے تاکہ ہم ان جگہوں کا پتہ لگا سکیں جہاں وہ گیا ہے۔ ہم نے پہلے ہی 19 ٹیمیں تشکیل دی ہیں۔ ہم دوسرے اضلاع سے بھی ایسے لوگوں کا پتہ لگا رہے ہیں جو نپاہ  مریض کے  رابطے میں آئے ہیں۔ ."

میڈیا رپورٹوں کے مطابق   مرکزی حکومت بھی نپاہ وائرس کو لے کر پوری طرح سنجیدہ ہے۔ مرکزی وزارت صحت بھی اس سلسلے میں پوری احتیاط برت رہی ہے۔ اسی کے ساتھ  مرکزی حکومت  نے ریاستی حکومت کی مدد کے لیے ماہرین کی ایک ٹیم بھی کیرالہ روانہ کی ہے۔

نپاہ کا تازہ معاملہ  ایک 24 سالہ ہیلتھ ورکر کا سامنے آیا ہے  جو نپاہ مریض کے قریبی رابطے میں تھا، اس کی رپورٹ مثبت آنے کےساتھ ہی نپاہ  وائرس کے مریضوں کی تعداد بڑٖھ کر  چھ ہوگئی۔

کیرالہ حکومت نے وائرس کے پھیلاؤ کو روکنے کے لیے کنٹینمنٹ زونز اور پابندیوں کا اعلان کیا ہے۔ جس کے بعد مریضوں کے رابطے میں آنے والے افراد کی فہرست بھی تشویش کا باعث بن گئی ہے کیونکہ 700 افراد مریضوں کے رابطے میں آئے ہیں۔ کیرالہ کی وزیر صحت وینا جارج نے کہا کہ ان 700 میں سے تقریباً 77 لوگ ہائی رسک کے زمرے میں ہیں۔

سات دیہاتوں کو کنٹینمینٹ زن میں کیا گیا تبدیل:   نپاہ وائرس کی وجہ سے کالی کٹ  کے 2 افراد کی موت کے بعد  کالی کٹ ( کوزی کوڈ) ضلع  میں قوانین کو سخت کر دیا گیا ہے اور تقریباً 7  دیہاتوں  کو کنٹینمنٹ زون میں تبدیل کردیا گیا ہے۔ کنٹینمنٹ زون کے علاقوں اور اسپتالوں میں ماسک پہننا لازمی قرار دیا گیا ہے۔

 اسکولوں اور کالجوں کی چھٹیاں24 ستمبر تک بڑھا دی گئیں: کوزی کوڈ میں اسکولوں اور کالجوں کی چھٹیاں 24 ستمبریعنی اگلے اتوار تک بڑھا دی گئی ہے۔ نپاہ وائرس پھیلنے کے پیش نظر احتیاطی اقدامات کے طور پر کوزی کوڈ ضلع کے تمام تعلیمی اداروں بشمول آنگن واڑیوں، مدرسوں، ٹیوشن سینٹروں اور پروفیشنل کالجوں میں بھی تعطیلات کا اعلان کیا گیا ہے۔

سدارامیا حکومت نے کرناٹک کے ان سرحدی اضلاع کے لیے سرکلر جاری کیا:  کیرالہ میں نپاہ وائرس کے بڑھتے معاملات کے پیش نظر کرناٹک حکومت نے ایک سرکلر جاری کیا ہے جس میں عام لوگوں کو مشورہ دیا گیا ہے کہ وہ کیرالہ کے متاثرہ علاقوں میں غیر ضروری سفر نہ کریں۔کیرالہ سے ملحقہ کرناٹک کے سرحدی اضلاع کوڈاگو، دکشن کنڑا، چامراج نگر اور میسورو میں چیک پوسٹ قائم کئے گئے ہیں جہاں بخار کی جانچ کی جارہی ہے۔ پتہ چلا ہے کہ کیرالہ کا کوئی باشندہ کرناٹک میں داخل ہونے کے دوران اُسے بخار ہونے کی صورت میں اُسے واپس کیرالہ بھیجا جارہا ہے۔