بھٹکل 10/ ستمبر (ایس او نیوز): بھٹکل نیشنل ہائی وے پر سڑک عبور کرنے کے دوران کار کی زد میں آکر ایک 62 سالہ شخص جاں بحق ہوگیا۔ حادثہ جمعرات کی صبح تقریباً 9 بجے شفا کراس کے قریب پیش آیا۔

مہلوک کی شناخت کمٹہ کے رہائشی پرمیشور راما دیواڑیگا (62) کے طور پر کی گئی ہے، جو بھٹکل کے مُنڈلی میں اپنے قریبی رشتہ داروں کے ساتھ مقیم تھا۔

بتایا گیا ہے کہ پرمیشور نے صرف دو روز قبل ہی بھٹکل کے ایک نجی اسپتال میں واچ مین کی حیثیت سے ملازمت شروع کی تھی۔ جمعرات کی صبح وہ شفا کراس کے قریب نیشنل ہائی وے عبور کررہا تھا کہ بھٹکل سے سرسی کی جانب جارہی ایک کار نے اسے ٹکر مار دی۔

حادثے میں شدید زخمی پرمیشور کو فوری طور پر قریبی اسپتال لے جایا گیا، تاہم اسپتال پہنچنے سے قبل ہی اس کی موت واقع ہوگئی۔

اس سلسلے میں بھٹکل ٹاؤن پولیس تھانے میں معاملہ درج کرلیا گیا ہے اور پولیس نے مزید تحقیقات شروع کردی ہے۔