ساحل آن لائن - سچائی کا آیئنہ

Header
collapse
...
Home / ساحلی خبریں / بھٹکل کے ' آئی ایف ایس' افسر کی قیادت میں ملک کی سب سے بڑی ٹائیگر پروٹیکشن کمانڈو فورس تشکیل؛ امیت شاہ کے ہاتھوں ایٹا نگر یونٹ کا افتتاح

بھٹکل کے ' آئی ایف ایس' افسر کی قیادت میں ملک کی سب سے بڑی ٹائیگر پروٹیکشن کمانڈو فورس تشکیل؛ امیت شاہ کے ہاتھوں ایٹا نگر یونٹ کا افتتاح

Sat, 21 Nov 2026 18:41:55    S O News
بھٹکل کے ' آئی ایف ایس' افسر  کی قیادت میں ملک کی سب سے بڑی ٹائیگر پروٹیکشن کمانڈو فورس تشکیل؛ امیت شاہ کے ہاتھوں ایٹا نگر یونٹ کا افتتاح

بھٹکل 21/نومبر (ایس او نیوز) : اروناچل پردیش میں بھٹکل سے تعلق رکھنے والے انڈین فاریسٹ سروس(آئی ایف ایس) افسر ڈاکٹر اے ٹی دامودر نائک کی قیادت میں تشکیل دی گئی ملک کی سب سے بڑی ٹائیگر پروٹیکشن کمانڈو فورس کا افتتاح مرکزی وزیر داخلہ امیت شاہ نے ہفتہ کو ایٹا نگر میں کیا۔

حکومتِ ہند کے نیشنل ٹائیگر کنزرویشن اتھارٹی (این ٹی سی اے) کی منظوری، سرپرستی اور ہدایات کے تحت اس خصوصی کمانڈو فورس کی تشکیل کی ذمہ داری اروناچل پردیش حکومت نے چیف کنزرویٹر آف فاریسٹ ڈاکٹر اے ٹی دامودر نائک کو سونپی تھی۔ انہوں نے گزشتہ چار برسوں کی مسلسل محنت اور کوششوں کے نتیجے میں اس اہم منصوبے کو عملی شکل دی ہے۔

ڈاکٹر دامودر نائک جولائی 2022 سے اروناچل پردیش کے بھارت-چین سرحدی علاقے کے برف پوش پہاڑی خطوں میں سرگرم شیر کے غیر قانونی شکار کرنے والوں کے خلاف کارروائی کے لیے تشکیل دی گئی خصوصی تحقیقاتی ٹیم (ایس آئی ٹی) کی قیادت بھی کر چکے ہیں۔ اس ٹیم نے دشوار گزار سرحدی علاقوں میں جاری غیر قانونی شکار کی سرگرمیوں کا سراغ لگاتے ہوئے شکاریوں کے خلاف مؤثر کارروائیاں کیں۔

اس وقت نئی تشکیل شدہ ٹائیگر پروٹیکشن کمانڈو فورس میں 438 اہلکار تعینات کیے گئے ہیں۔ اس فورس کی ایک نمایاں خصوصیت یہ ہے کہ ملک میں پہلی مرتبہ مجموعی بھرتیوں میں تقریباً نصف تعداد خواتین کمانڈو گارڈز کی ہے۔ اسے ملک میں جنگلی حیات اور بالخصوص شیروں کے تحفظ کی کوششوں میں ایک اہم پیش رفت قرار دیا جا رہا ہے۔

ڈاکٹر اے ٹی دامودر نائک اس سے قبل لکشدیپ میں پانچ برس تک پرنسپل چیف وائلڈ لائف وارڈن کے عہدے پر فائز رہنے کے علاوہ نو مختلف محکموں کے پرنسپل سکریٹری کی حیثیت سے بھی خدمات انجام دے چکے ہیں۔ اپنے دورِ کار میں انہوں نے لکشدیپ کے دلکش سمندری سیاحتی مقامات اور تجارتی ماہی گیری کے وسائل کو عالمی سطح پر متعارف کرانے کے لیے اہم اقدامات کیے، جس پر انہیں وزیر اعظم نریندر مودی کی ستائش بھی حاصل ہوئی تھی۔

ڈاکٹر اے ٹی دامودر نائک   بھٹکل سے تعلق رکھتے ہیں اور جولائی 2022 سے اروناچل پردیش میں اپنی خدمات انجام دے رہے ہیں۔ ان کی قیادت میں ملک کی سب سے بڑی ٹائیگر پروٹیکشن کمانڈو فورس کی تشکیل کو بھٹکل کے لیے بھی باعثِ فخر قرار دیا جا رہا ہے۔

Click here for report in English


Share: