دبئی 17/نومبر (ایس او نیوز) : سعودی عرب میں 800 ریال ماہانہ تنخواہ پر کلرک کی حیثیت سے اپنی عملی زندگی شروع کرنے والے بھٹکل سے تعلق رکھنے والے معروف کاروباری شخصیت جناب عتیق الرحمن مُنیری نے اپنی محنت، غیر معمولی بچت، دور اندیشی اور دیانت داری کے ذریعے بین الاقوامی کاروباری دنیا میں اپنی ایک منفرد شناخت قائم کی ہے۔ دبئی میں اپنی کمپنی ’نُہٰی جنرل ٹریڈنگ‘ کے قیام کے 25 سال مکمل ہونے پر منعقدہ سلور جوبلی تقریب کے موقع پر انہوں نے اپنی کامیابی کے سفر کے ایسے پہلو بیان کیے جو بالخصوص نوجوانوں کے لیے محنت، کاروباری منصوبہ بندی اور عملی زندگی میں آگے بڑھنے کا ایک اہم سبق ہیں۔
عتیق الرحمن مُنیری کی کاروباری زندگی کا آغاز کسی بڑے سرمائے یا خاندانی کاروبار سے نہیں ہوا، بلکہ ایک معمولی ملازمت، محدود آمدنی اور بچت کی عادت سے ہوا۔ انہوں نے 21 سال کی عمر میں سعودی عرب کے شہر دمام میں ایک کمپنی میں کلرک کی حیثیت سے ملازمت اختیار کی، جہاں انہیں ماہانہ 800 ریال تنخواہ ملتی تھی۔ تاہم انہوں نے اپنی محدود آمدنی کو اپنی ترقی کی راہ میں رکاوٹ نہیں بننے دیا۔
ملازمت کے دوران جمعرات کو آدھے دن اور جمعہ کو مکمل چھٹی کے موقع پر وہ کپڑوں کی دکانوں پر اضافی کام کرتے تھے، جس سے انہیں ماہانہ تقریباً 400 ریال مزید حاصل ہوتے تھے۔ ان کا کہنا ہے کہ اس زمانے میں بس کے سفر پر دو ریال خرچ ہوتے تھے، لیکن وہ یہ رقم بچانے کے لیے پیدل سفر کو ترجیح دیتے اور بچائے گئے دو ریال بھی اپنے سیونگ باکس میں جمع کرتے تھے۔ ان کے نزدیک کامیابی کے سفر میں چھوٹی سے چھوٹی بچت بھی اہمیت رکھتی ہے۔

ملازمت سے کاروبار تک کا سفر
عتیق الرحمن مُنیری نے سعودی عرب میں چار ملٹی نیشنل کمپنیوں میں کام کیا اور اپنی صلاحیتوں، محنت اور تجربے کی بنیاد پر کلرک سے ترقی کرتے ہوئے ڈویژنل منیجر اور پھر جنرل منیجر کے عہدے تک پہنچے۔ ان ملازمتوں نے انہیں کاروباری نظم و نسق، مارکیٹ کی ضروریات، انتظامی امور اور بین الاقوامی تجارت کو قریب سے سمجھنے کا موقع فراہم کیا۔
1999 میں وہ دبئی منتقل ہوئے، جہاں انہوں نے اپنے ذاتی کاروبار کی بنیاد رکھنے کے لیے عملی کوششیں شروع کیں۔ اس سے قبل وہ دنیا کے کئی ممالک کا دورہ کرچکے تھے۔ ان دوروں کا مقصد محض سیاحت نہیں تھا، بلکہ مختلف ممالک کے معاشی حالات، کاروباری امکانات، مارکیٹ کی ضروریات اور سرمایہ کاری کے مواقع کا جائزہ لینا تھا، تاکہ حلال اور جائز طریقے سے کاروبار کے لیے موزوں مقام اور شعبے کا انتخاب کیا جاسکے۔
مختلف ممالک کا مشاہدہ کرنے کے بعد انہیں دبئی کاروبار کے لیے ایک سازگار مقام محسوس ہوا۔ چنانچہ اپنی برسوں کی محنت سے جمع کی گئی قریب دو لاکھ درہم کی رقم سے انہوں نے 2001 میں اپنی خوش نصیب بیٹی نُہٰی کے نام سے ’نُہٰی جنرل ٹریڈنگ‘ کا ٹریڈ لائسنس حاصل کیا اور باقاعدہ کمپنی قائم کی۔ ان کے مطابق کاروباری سرگرمیوں کا آغاز 1999 ہی میں ہوچکا تھا، جبکہ کمپنی کا باضابطہ قیام 2001 میں عمل میں آیا۔
69 ممالک کے تجربات اور کاروباری روابط کا ثمر

عتیق الرحمن مُنیری کی کاروباری کامیابی کا ایک نمایاں پہلو یہ ہے کہ انہوں نے کاروبار کو محض خرید و فروخت تک محدود نہیں رکھا، بلکہ دنیا کے مختلف ممالک میں اپنے دوروں کے دوران قائم کیے گئے روابط کو مستقل کاروباری تعلقات میں تبدیل کیا۔ ان کے مطابق وہ اب تک 69 ممالک کا دورہ کرچکے ہیں۔
ان کے مطابق انہوں نے غریب اور امیر دونوں طرح کے ممالک میں کاروباری افراد سے تعلقات استوار کیے اور ان روابط کو اعتماد اور باہمی فائدے کی بنیاد پر آگے بڑھایا۔ 1999 میں یمن کے دورے کے دوران انہوں نے وہاں ایک طرف شدید غربت اور دوسری طرف بڑے سرمایہ داروں کی موجودگی کا مشاہدہ کیا۔ انہوں نے سرمایہ رکھنے والے افراد کو اپنے سرمائے کی مناسب اور درست سرمایہ کاری کے ذریعے منافع حاصل کرنے کے طریقے بتائے، جس سے ان سرمایہ کاروں کو فائدہ پہنچا اور ان کے ساتھ مضبوط کاروباری تعلقات قائم ہوئے۔
ان کا کہنا ہے کہ کاروبار میں اعتماد حاصل کرنا جتنا اہم ہے، اسے برقرار رکھنا تقریباً ناممکن ہے۔ جن لوگوں نے ان پر بھروسہ کیا، انہوں نے بھی ان کے اعتماد اور وفاداری کا جواب پوری امانت داری اور دیانت داری سے دیا۔
اس کی ایک نمایاں مثال 2014 میں یمن میں جنگ کے دوران سامنے آئی۔ وہاں کے حالات انتہائی خراب ہوگئے تھے اور کاروباری افراد کو اپنے سرمائے کے تحفظ کے حوالے سے شدید خدشات لاحق تھے۔ ایسے مشکل وقت میں یمن کے متعدد بڑے کاروباری حضرات نے اپنی لاکھوں درہم کی رقوم ان کے پاس بطور امانت محفوظ رکھنے کے لیے بھیجیں۔
عتیق الرحمن مُنیری نے ان رقوم کو اپنے کاروباری سرمائے سے الگ امانت کے طور پر محفوظ رکھا اور جب حالات بہتر ہوئے اور متعلقہ افراد نے اپنی رقوم واپس طلب کیں تو تمام رقم پوری امانت داری کے ساتھ انہیں لوٹا دی۔ ان کے مطابق اس واقعے کے بعد ان کاروباری حلقوں میں ان پر اعتماد مزید مضبوط ہوا۔
یہ تجربہ ان کے کاروباری فلسفے کا ایک اہم پہلو واضح کرتا ہے کہ کاروبار میں منافع سے بڑھ کر ساکھ اور اعتماد کی اہمیت ہوتی ہے۔ سرمایہ کاروبار کو وسعت دیتا ہے، لیکن دیانت داری کاروباری تعلقات کو پائیدار بناتی ہے۔
بچت، منصوبہ بندی اور رسک لینے کی صلاحیت
عتیق الرحمن مُنیری کے مطابق کاروبار شروع کرنے کے لیے صرف سرمایہ ہونا کافی نہیں، بلکہ اس کے ساتھ تجربہ، منصوبہ بندی، مارکیٹ کی سمجھ اور مشکل حالات میں فیصلے کرنے کی صلاحیت بھی ضروری ہے۔ انہوں نے اپنی ملازمت کے دوران حاصل ہونے والے تجربے، مختلف ممالک کے دوروں اور برسوں کی بچت کو اپنے کاروبار کی بنیاد بنایا۔
ان کا کہنا ہے کہ کاروبار میں ہمیشہ اتار چڑھاؤ آتے رہتے ہیں۔ انہیں بھی اپنے کاروبار کو آگے بڑھانے کے لیے کئی مرتبہ بڑے خطرات مول لینے پڑے اور مختلف چیلنجوں کا سامنا کرنا پڑا، لیکن انہوں نے مشکلات سے گھبرانے کے بجائے اللہ پر بھروسہ رکھتے ہوئے ان کا مقابلہ کیا۔
وہ اپنی کامیابی میں والدین کی تربیت اور والد کی دعاؤں کو بنیادی اہمیت دیتے ہیں۔ ان کے مطابق ان کی شریک حیات نے بھی ہر مرحلے پر بھرپور ساتھ دیا اور حوصلہ افزائی کی، جو ان کے کاروباری سفر میں ایک اہم موڑ ثابت ہوئی۔

نوجوانوں کے نام اہم پیغام
نوجوانوں کو پیغام دیتے ہوئے عتیق الرحمن مُنیری نے کہا کہ زندگی میں کچھ کر گزرنے اور اپنے مستقبل کی بنیاد مضبوط بنانے کے لیے 30 سے 40 سال کی عمر کا زمانہ انتہائی اہم ہے۔ اس عرصے میں محنت، مشقت، دیانت داری اور مستقل مزاجی کے ساتھ کام کیا جائے تو انسان زندگی میں آگے بڑھ سکتا ہے۔ ان کے مطابق 40 سال کی عمر کے بعد نئے سفر کا آغاز نسبتاً مشکل ہوجاتا ہے، اس لیے نوجوانوں کو اپنی توانائیاں اور صلاحیتیں بروقت استعمال کرنی چاہئیں۔
انہوں نے کہا کہ انہوں نے خود 33 سال کی عمر میں اپنے کاروبار کا باقاعدہ آغاز کیا تھا۔ نوجوانوں کو چاہیے کہ ملازمت کے ساتھ تجربہ حاصل کریں، اپنی آمدنی میں سے بچت کی عادت اپنائیں، کاروباری مواقع کا مطالعہ کریں اور مناسب تیاری کے بعد اپنا کاروبار شروع کرنے کی کوشش کریں۔
ان کا کہنا تھا کہ کاروبار میں مشکلات اور ناکامیوں کے امکانات ہمیشہ موجود رہتے ہیں، لیکن ان سے گھبرانے کے بجائے حوصلے، ایمانداری اور مستقل مزاجی سے آگے بڑھنا چاہیے۔ اللہ تعالیٰ پر مکمل توکل اور بھروسہ رکھتے ہوئے جائز راستے پر محنت کرنا ضروری ہے۔ ان کے مطابق اللہ پر بھروسہ کرتے ہوئے اپنی ذمہ داریاں پوری کرنا اور حلال ذرائع سے آگے بڑھنے کی کوشش کرنا بھی حقیقی بندگی کا حصہ ہے۔
کاروبار کی توسیع اور سماجی زندگی میں حصہ داری
دبئی میں نُہٰی جنرل ٹریڈنگ کے قیام کے بعد عتیق الرحمن مُنیری کا کاروبار بتدریج مختلف ممالک تک پھیلتا گیا۔ آج ان کے کاروباری روابط اور سرگرمیاں دبئی کے علاوہ سعودی عرب کے دمام، ریاض اور جدہ، یمن، عراق اور ہندوستان تک پھیلی ہوئی ہیں۔
ماضی میں ان کی کمپنی کا سامان افریقہ کے مختلف ممالک میں بھی سپلائی کیا جاتا تھا، تاہم وہاں کے ناسازگار حالات کے پیش نظر تقریباً 15 سال قبل انہوں نے ان ممالک میں مال کی فروخت بند کردی۔
دبئی میں نُہٰی جنرل ٹریڈنگ کے علاوہ وہ ’آوز‘ (Auz) کے نام سے رئیل اسٹیٹ کا کاروبار بھی کرتے ہیں، جس کی ذمہ داری ان کے فرزند عبدالبدیع سنبھال رہے ہیں۔
عتیق الرحمن مُنیری کا کہنا ہے کہ جب کاروبار ایک مستحکم مرحلے میں پہنچ گیا اور ان کی عمر 50 سال کے قریب ہوئی تو انہوں نے سماجی اداروں اور جماعتی سرگرمیوں میں بھی حصہ لینا شروع کیا اور قومی و ملی کاموں کے لیے اپنی خدمات پیش کیں۔
ساتھی اور احباب ہی اصل اثاثہ
نُہٰی جنرل ٹریڈنگ کی سلور جوبلی کے موقع پر عتیق الرحمن مُنیری نے دبئی میں اپنے دوست احباب، کاروباری ساتھیوں اور قریبی رفقا کے اعزاز میں سمندری کروز پر ایک پروقار تقریب کا اہتمام کیا۔ اس موقع پر انہوں نے اپنے ساتھیوں کو اپنی کامیابی کا اہم حصہ قرار دیتے ہوئے کہا کہ آج ان کے ساتھ جو احباب اور رفقا موجود ہیں، وہ ان کے لیے اصل اثاثہ ہیں۔ ان کے مطابق دوستوں، ساتھیوں، خیر خواہوں کی حوصلہ افزائی اور دعاؤں نے ان کے کاروباری سفر میں اہم کردار ادا کیا ہے۔
واضح رہے کہ جناب عتیق الرحمن مُنیری کرناٹک کے معروف ڈیجیٹل میڈیا ادارے ساحل آن لائن کے چیئرمین بھی ہیں۔ نُہٰی جنرل ٹریڈنگ کی سلور جوبلی کے موقع پر بھٹکل اور خلیجی ممالک کی اہم شخصیات اور ذمہ داران نے انہیں مبارکباد پیش کی، جبکہ سعودی عرب اور دیگر ممالک سے تعلق رکھنے والے کاروباری احباب نے بھی نیک تمناؤں اور مزید کامیابیوں کے لیے دعاؤں کا اظہار کیا۔
عتیق الرحمن مُنیری کی زندگی کا یہ سفر نوجوانوں کے لیے ایک اہم پیغام رکھتا ہے کہ کامیابی محض بڑے سرمائے، خوش قسمتی یا وسائل کی محتاج نہیں ہوتی۔ محدود آمدنی میں بچت، مسلسل سیکھنے کا جذبہ، مارکیٹ کا درست انتخاب، مضبوط کاروباری روابط، وعدوں کی پاسداری، امانت داری اور مشکل حالات میں ثابت قدمی انسان کو ترقی کی راہ پر گامزن کرسکتی ہے۔ ان کی داستان اس حقیقت کی عکاس ہے کہ کاروبار کی اصل بنیاد صرف سرمایہ نہیں، بلکہ اعتماد، کردار اور برسوں کی محنت ہوتی ہے۔