جودھ پور ، 23/ جون (ایس او نیوز /ایجنسی)  راجستھان کی جودھ پور پولیس نے ہفتے کے روز ایک پرتشدد فرقہ وارانہ تصادم کے سلسلے میں کم از کم 51 لوگوں کو حراست میں لیا جو جمعہ کی رات دیر گئے سورساگر کے علاقے میں دو مذہبی گروپوں کے درمیان پھوٹ پڑا-

ہندستان ٹائمس نے پولیس کے حوالہ سے بتایا کہ اس پیشرفت سے واقف پولیس حکام نے کہا راجا رام سرکل کے قریب ایک عیدگاہ میں دو نئے گیٹ لگانے کو لے کر جھڑپیں ہوئیں۔

ہندستان ٹائمس کے مطابق جودھ پور کے پولیس کمشنر راجیندر سنگھ نے کہا، "یہ تنازعہ گزشتہ چند دنوں سے چل رہا ہے… یہ واقعہ تقریباً 10:15 بجے (جمعہ کو) اس وقت پیش آیا جب 10 سے 15 مقامی لوگوں کے ایک گروپ نے عیدگاہ سے دوسرے گروپ پر پتھراؤ کیا۔ .مسٹرسنگھ نے مزید کہا کہ کشیدگی بڑھتے ہی، ہجوم نے ایک مقامی دکان کو آگ لگا دی اور دو کاروں بشمول ایک پولیس وین میں توڑ پھوڑ کی۔

اس معاملے سے واقف پولیس حکام کے مطابق عیدگاہ کی عقبی دیوار پر دو نئے گیٹس کی تنصیب کو لے کر گزشتہ کچھ دنوں سے تنازعہ چل رہا ہے جب مقامی لوگوں نے الزام لگایا کہ ان کی تعمیر میں مقامی میونسپلٹی کے قانونی پروٹوکول پر عمل نہیں کیا گیا ہے۔

سنگھ نے کہا کہ جمعہ کی رات جب عملہ عیدگاہ کے گیٹ کا افتتاح کرنے کے لیے آگے بڑھا تو مقامی لوگوں نے احتجاج کیا۔ تاہم، پولیس اور مقامی میونسپلٹی کے اہلکار موقع پر پہنچ گئے اور دونوں گروپوں کے پانچ ارکان کی موجودگی میں رات 9.30 بجے کے قریب بات چیت کے بعد معاملہ حل ہو گیا۔سنگھ نے کہا، "معاہدے کے بعد، گیٹ کو فوری طور پر بند کر دیا گیا اور بھیڑ منتشر ہو گئی،” ۔

انہوں نے کہا کہ کشیدگی اس وقت پھیل گئی جب 10 سے 15 افراد کے ایک گروپ نے تاجروں کے علاقے میں اچانک پتھراؤ شروع کر دیا اور دوسرے گروپ نے جوابی کارروائی کی۔“کمشنر کے مطابق اس واقعہ میں چوپاسنی ہاؤسنگ بورڈ پولیس اسٹیشن کے انسپکٹر نتن ڈیو اور کانسٹیبل شیطان سنگھ سمیت دو پولیس اہلکار زخمی ہو گئے۔ ڈیو کی گردن پر شدید چوٹیں آئیں اور اسے ہسپتال لے جایا گیا۔ انہیں ہفتہ کی صبح ڈسچارج کر دیا گیا۔”،

کمشنر سنگھ نے بتایا صورتحال اب قابو میں ہے۔ پولیس علاقے میں مسلسل گشت کر رہی ہے۔ اب تک تقریباً 51 افراد کو حراست میں لیا گیا ہے۔ تاہم علاقے میں امن کو خراب کرنے والے تمام افراد کو حراست میں لینے کے لیے تحقیقات جاری ہیں۔ ہم اس بات کی بھی تحقیقات کر رہے ہیں کہ دونوں گروپوں کے درمیان معاہدہ طے پانے کے باوجود کشیدگی کو کیسے بھڑکا دیا گیا؟۔