بنگلورو ، 17/ مارچ (ایس او نیوز /ایجنسی) وزیر اعلیٰ سدارامیا نے کہا ہے کہ ریاست میں خواتین کو بااختیار بنانے کے لیے کانگریس حکومت مسلسل اقدامات کر رہی ہے اور حکومتی گارنٹی اسکیموں کے نتیجے میں خواتین کی معاشی اور سماجی حالت میں نمایاں بہتری آئی ہے۔وہ کرناٹک پردیش مہیلا کانگریس کی جانب سے منعقدہ عاملہ اجلاس اور تربیتی کیمپ سے خطاب کر رہے تھے۔

وزیر اعلیٰ نے کہا کہ 2013 تا 2018 اور اب 2023 کے بعد کانگریس حکومت نے خواتین کی فلاح و بہبود اور ان کے استحکام پر خصوصی توجہ دی ہے۔

انہوں نے بتایا کہ حکومت کی اہم گارنٹی اسکیموں میں شامل شکتی یوجنا کے تحت اب تک خواتین 700 کروڑ سے زائد سفر کر چکی ہیں، جس سے انہیں بڑی سہولت حاصل ہوئی ہے۔

انہوں نے مزید کہا کہ خواتین کے لیے شروع کی گئی مختلف اسکیموں نے ان کے حقوق کے تحفظ کو یقینی بنایا ہے اور حکومت کی گارنٹیوں کے باعث خواتین کی خریداری کی صلاحیت میں بھی اضافہ ہوا ہے۔

گرہا لکشمی یوجنا کے تحت ریاست کی 1.26 کروڑ خواتین کو ہر ماہ 2000 روپے دیے جا رہے ہیں، جس سے ان کی معاشی اور سماجی حالت بہتر ہوئی ہے اور معاشی خودمختاری کے باعث ان کے اعتماد میں بھی اضافہ ہوا ہے۔

وزیر اعلیٰ نے اس موقع پر ڈاکٹر بی۔آر۔ امبیڈکر کے نظریات کا حوالہ دیتے ہوئے کہا کہ جب تک معاشرے میں صنفی امتیاز اور عدم مساوات کا خاتمہ نہیں ہوتا، تب تک آزادی کے حقیقی مقاصد حاصل نہیں ہو سکتے۔

سدارامیا نے کہا کہ خواتین میں قیادت کی صلاحیت نہایت اہم ہے اور اگر سب کو یکساں مواقع فراہم کیے جائیں تو سماجی مساوات حاصل کرنا آسان ہو جاتا ہے۔

انہوں نے بتایا کہ کرناٹک پردیش مہلا کانگریس میں اس وقت ایک لاکھ سے زیادہ خواتین ارکان موجود ہیں اور مستقبل میں اس تعداد کو بڑھا کر دو لاکھ تک پہنچانے کا ہدف رکھا گیا ہے۔

انہوں نے کہا کہ چونکہ باگلکوٹ اور داونگیرے میں ضمنی انتخابات قریب ہیں، اس لیے حکومت کی عوامی فلاحی اسکیموں کے بارے میں عوام میں بیداری پیدا کرنے میں خواتین کارکنوں کا کردار نہایت اہم ہوگا۔

اس مقصد کے لیے خواتین کارکنوں کی دو ٹیمیں تشکیل دے کر انتخابی مہم میں سرگرمی سے حصہ لینے کی ہدایت دی گئی ہے۔

وزیر اعلیٰ نے یاد دلایا کہ گزشتہ مرتبہ چنّاپٹنا، شگگاؤں اور سندور کے ضمنی انتخابات میں کانگریس نے کامیابی حاصل کی تھی۔

انہوں نے اعتماد ظاہر کیا کہ اس بار بھی باگلکوٹ اور داونگیرے دونوں نشستوں پر کانگریس کامیابی حاصل کرے گی اور اس کے لیے پارٹی نے مکمل تیاری کر لی ہے۔