بھٹکل میں پاگل کتے کا چار لوگوں پر حملہ؛ سرکاری اسپتال میں انجکشن سپلائی نہ ہونے پر عوام برہم
بھٹکل 10/ستمبر (ایس او نیوز) بھٹکل میں ایک پاگل کتے نے اچانک چار لوگوں پر حملہ کرتے ہوئے چاروں کو کاٹ لیا، جس کے نتیجے میں چاروں کو بھٹکل سرکاری اسپتال لے جایا گیا ۔
بتایا گیا ہے کہ پاگل کتے نے پہلے مٹھلی میں دو الگ الگ لوگوں کو اُن کے مکان کے کمپائونڈ کے اندر گھس کر حملہ کیا، پھر وہاں سے کچھ ہی فاصلے پر پہنچ کر موڈ بھٹکل میں راہ چلنے کے دوران دو لوگوں پر حملہ کرکے اُنہیں بھی کاٹ لیا۔
زخمیوں کی شناخت مُٹھلی کی رہنے والی میناکشی نارائن نائک (28)، رجنی وینکٹ رمن نائک (28)، موڈ بھٹکل کی رہنے والی ساوتری کرشنا نائک (40) اور موڈ بھٹکل ہی کے لکشمن وینکٹ رمن نائک (38) کی حیثیت سے کی گئی ہے۔
چاروں کو زخمی حالت میں جب بھٹکل سرکاری اسپتال لے جایا گیا تو پتہ چلا کہ وہاں پاگل کتے کے کاٹنے پر دیا جانے والا انجکشن نہیں ہے۔ فوری طور پر باہر پرائیویٹ کلینک سے انجکشن لاکر چاروں کو لگوایا گیا ہے اور چاروں کی مرہم پٹی کی گئی ہے۔
سرکاری اسپتال میں متعلقہ انجکشن نہ ہونے پر موقع پر موجود عوام اور مریضوں کے رشتہ دار اسپتال عملہ پر برہم ہوگئے، اور پوچھا کہ غریب عوام ایسے موقعوں پر کہا ں جائیں گے ؟ بتایا گیا ہے کہ پرائیویٹ کلینک میں ایک انجکشن کی قیمت دو ہزار روپیہ ہے اور ہر مریض کو ایسے دو دو انجکشن لگوائے گئے ہیں۔ اس موقع پر بھٹکل تعلقہ پنچایت ممبر میناکشی جٹپّا نائک بھی اسپتال پہنچ کر مریضوں کی عیادت کی اور اس بات پر ناراضگی ظاہر کی کہ غریب عوام اگر اسپتال میں آئیں گے تو وہ اتنا مہنگا انجکشن کیسے خرید پائیں گے۔
اس تعلق سے ساحل آن لائن نے جب کاروار میں موجود ڈسٹرکٹ ہیلتھ آفسر ڈاکٹر اشوک کمار سے وضاحت چاہی تو انہوں نے بتایا کہ سرکاری اسپتالوں میں صرف عام کتا کاٹنے کا انجکشن سپلائی کیا جاتا ہے، پاگل کتا کاٹنے پر چونکہ زخم گہرا ہوتا ہے، اس کے لئے کسی بھی سرکاری اسپتال میں انجکشن کی سپلائی نہیں ہے۔