بھٹکل میں دو آٹو رکشہ کی ٹکر کے بعد کار بھی حادثے کا شکار؛ ایک خاتون ہلاک، پانچ زخمی
بھٹکل 11/نومبر (ایس او نیوز) یہاں رنگین کٹہ میں جے ایم ایف سی کورٹ کے بالمقابل ہوئے ایک سڑک حادثہ میں ایک خاتون ہلاک ہوگئی، جبکہ دیگر پانچ شدید زخمی ہوگئے جن میں ایک کی حالت نازک بتائی گئی ہے۔ حادثہ اتوار صبح قریب 6:30 بجے پیش آیا۔
بتایا گیا ہے کہ ایک رکشہ شرالی سے سنتے مارکٹ کی طرف جارہا تھا،جبکہ تنگنگونڈی سے سرکل کی طرف جانے والا رکشہ اوور ٹیک کرنے کی کوشش میں شرالی کے رکشہ سے ٹکرا گیا، ٹکر لگتے ہی دونوں رکشہ اُلٹ گئے، اس دوران مخالف سمت سے آنے والی بنگلور سے مرڈیشور کی طرف جانے والی تیز رفتار کار بے قابو ہوکر ان دونوں رکشہ سے ٹکراگئی، جس کے نتیجے میں چھ لوگ زخمی ہوگئے۔ زخمیوں کو فوری طور پر بھٹکل سرکاری اسپتال منتقل کیا گیا تھا جہاں سے دو کو نازک حالت میں منی پا ل روانہ کیا گیا، مگر منی پال لے جانے کے دوران ایک عورت زخموں کی تاب نہ لاکر راستے میں ہی چل بسی۔ عورت کی شناخت شرالی تٹی ہکّکل کی مادھوی سریش نائک (42) کی حیثیت سے کی گئی ہے۔ وہ شرالی کے تٹی ہّکل سے ناریل کو سنتے مارکٹ میں فروخت کرنے لے جارہی تھی۔ حادثے میں دوسرے رکشہ کا ڈرائیور تنگنگونڈی کا رہنے والا ناگیش سنتمّا نائک (50) کی حالت نازک بتائی گئی ہے اور اسے منی پال اسپتال میں داخل کیا گیا ہے۔
مُٹھلی کا رہنے والا رکشہ ڈرائیور چندراکوئیدا نائک (33)، رکشہ پر سوارشرالی ماوین کٹے کے بھاسکر نائک (49)، کار پر سوار بنگلور وہائیٹ فیلڈ کے رہنے والی رتنما مُنیٹپّا (22)، کاویا وینکٹیش (20) بھی زخمیوں میں شامل ہیں جن میں ایک کو اُڈپی اور باقی کو کنداپور اسپتال منتقل کیا گیا ہے۔
ٹکر لگتے ہی ایک آٹو رکشہ سے گیس رسنا شروع ہوگیا، جس کو دیکھتے ہوئے فوری طورپر فائر بریگیڈ کی مدد لی گئی اور گیس کے اخراج کو روک دیا گیا۔
بھٹکل ٹاون پولس تھانہ میں معاملہ درج کیا گیاہے اور پولس مزید چھان بین کررہی ہے۔
