بھٹکل:27جون(ایس او نیوز)دیہی پولس تھانہ بھٹکل اورشمس انگلش میڈیم ہائی اسکول بھٹکل کے اشتراک سے شمس انگلش میڈیم ہائی اسکول میں عالمی منشیات مخالف دن کے موقع پر خصوصی پروگرام کا انعقاد کیا گیا ۔اس موقع پر خطاب کرتے ہوئے دیہی پولس تھانہ بھٹکل کے پی ایس آئی منجپا بی نے کہاکہ منشیات کے استعمال سے ملک کمزور ہوتا ہے۔ طلبا کی ذمہ داری بنتی ہے کہ اگر ان کے خاندان میں یا گلی محلہ میں کوئی منشیات کا استعمال کررہاہے تو اس کی سختی کے ساتھ مخالفت کریں اور انہیں برائی سے بچانے کی تدابیر کرنے کی اپیل کی۔ اے ایس آئی نوین بورکر نے خطاب کرتے ہوئے کہاکہ سگریٹ ، شراب نوشی جیسی بری عادتوں سے انسان بہت جلد ہلاک ہوجاتاہے۔ شرابیوں سے صرف متعلقہ فرد ہی بیمار نہیں ہوتا بلکہ پورا ماحول بیمار زدہ ہونے کی بات کہی۔ جو لوگ منشیات کا استعمال کرتے ہیں وہ کئی جرائم میں شامل رہتے ہیں ، ہم میں سے ہر ایک کی ذمہ داری بنتی ہے کہ وہ ماحول میں ایسی بری عادتوں میں لت پت افراد کو روکیں اور سماج کو صحت مند بنائیں۔
ادارے کے سکریٹری اور جماعت اسلامی ہند اترکنڑا کے ناظم طلحہ سدی باپا نے پروگرام کی صدارت کرتے ہوئے کہاکہ دین اسلام پورے سماج کو برائیوں سے پاک کرنے اور بھلائیوں کو فروغ دینے کی تعلیم دیتاہے۔ کچھ لوگ اس کو نظر انداز کرکے منشیات میں ملوث ہوجاتے ہیں، ہرایک برائی کی جڑ شراب ہے ، اسلام نشہ آوری کو جڑ سے اکھاڑ پھینکنےکی دعوت دیتاہے۔ اور اس کے قریب بھی پھٹکنےسےمنع کرتاہے۔ مذاہب میں نشہ آوری، جوا اور منشیات کے لئے کوئی جگہ نہیں ہے، انہوں نے محکمہ پولس کی ستائش کرتے ہوئے کہاکہ محکمہ پولس ایسے پروگرام کا انعقاد کرتے ہوئے برائیوں کو مٹانےمیں تعاون کررہاہے۔ ہائی اسکول صدر مدرس محمد رضا مانوی نے افتتاحی کلمات پیش کرتے ہوئے کہاکہ دیگر مقامات سے بھٹکل کاموازنہ کریں تو یہاں کے نوجوان برائیوں سے دور ہیں۔ کچھ معاشی سطح پر کمزور علاقوں میں ایسی برائیاں نظر آتی ہیں، ان میں بیداری پیدا کرتے ہوئے ایک برائیوں سے پاک سماج کی تعمیر کرنا ممکن ہونےکی بات کہی۔ طلبا لیڈر اصباح ادیاور اور اسبات احمد نے پروگرام کی بہترین انداز میں نظامت کی۔ استاد مہیش نائک نے شکریہ اداکیا۔ جماعت اسلامی ہند بھٹکل کے امیر مقامی مجاہد مصطفیٰ ، مانیشور وغیرہ ڈائس پر موجود تھے۔