بھٹکل میں دانتوں کے امراض کا مفت ٹریٹمنٹ کیمپ؛ ینوپویا اسپتال سے ماہر ڈاکٹروں کی خدمات؛ کثیر تعداد میں مریضوں نے کیا استفادہ
بھٹکل 24/ستمبر (ایس او نیوز) مینگلور ینوپویا اسپتال کی ماہر ڈینٹیسٹ اور بھٹکل کے معروف لیڈر عنایت اللہ شاہ بندری کی بھتیجی ڈاکٹر نازیہ سیف اللہ شاہ بندری نے آج اتوار کو بھٹکل بندرروڈ پر دانتوں کے امراض کے علاج کے لئے ایک فری ڈینٹل ٹریٹمنٹ کیمپ کا انعقاد کیا جس میں کثیر تعداد میں بھٹکل کے مریضوں نے استفادہ کیا۔
کیمپ شروع ہونے سے ایک روز قبل ہی قریب پانچ سو لوگوں نے اپنا رجسٹریشن کروایا تھا، اتنی بڑی تعداد میں مریضوں کے رجسٹریشن کو دیکھتے ہوئے مینگلور ینوپویا اسپتال کے پچاس ڈاکٹروں نے اپنی خدمات پیش کیں۔ بتایا گیا ہے کہ آج اتوار کو کیمپ شروع ہونے کے بعد صبح سے دوپہر تک مزید ڈیڑھ سو لوگوں نے اپنا نام درج کرایا۔ خواتین کی بھی بڑی تعداد کیمپ سے استفادہ کرتی نظر آئیں۔
ڈینٹل چیک آپ اور ٹریٹمنٹ کیمپ کی شروعات صبح نو بجے ہوئی، جبکہ اس تعلق سے ایک اسٹیج پروگرام گیارہ بجے رکھا گیا جس میں مہمان خصوصی کے طور پر تشریف فرما ینوپویا ڈینٹل کالج کے ہیڈ آف دی ڈپارٹمنٹ ڈاکٹر گنیش شنوئی نے خطاب کرتے ہوئے دانتوں کو صاف رکھنے اور بیماریوں سے دور رکھنے کی تدابیر پیش کیں۔ پروگرام میں شریک مقامی ہائی اسکول کے طلبہ سے مخاطب ہوتے ہوئے انہوں نے اُن سے عہد لیا کہ وہ شراب اور تمباکونوشی ہرگز نہیں کریں گے، سگریٹ سے بھی دور رہیں گے۔ انہوں نے طلبہ کو مشورہ دیا کہ وہ کھانے سے پہلے اپنے ہاتھ دھویں اور کھانے کے بعد منہ صاف کریں۔ انہوں نے کھانے کے فوری بعد برش کرنے اور دانتوں کا خیال رکھنے کی بھی تاکید کی۔
ڈاکٹر نازیہ شاہ بندری نے بھٹکل کے عوام سے درخواست کی کہ دانتوں کے متعلق اُنہیں کوئی بھی شکایت ہو تو وہ اُن سے راست رابطہ کریں اور مینگلور ینوپویااسپتال میں علاج کرائیں، جہاں کئی ساری سہولیات کے ساتھ ساتھ فری علاج بھی ہوتا ہے۔انہوں نے آج کےکیمپ میں شریک ہونے والوں کو ینوپویااسپتال کی جانب سے ایک گرین کارڈ دئے جانے کا بھی اعلان کیا، جس کی مدد سے ینوپویااسپتال میں دانتوں کا مفت علاج کرایا جائے گا۔
بھٹکل میں آج کے کیمپ میں کثیر لوگوں کی شرکت پر انہوں نے کہا کہ سبھوں کی جانچ کی جائے گی اور ہر ایک کا علاج ہوگا، ساتھ ساتھ مرڈیشور اور منکی کے لوگوں نے بھی رابطہ کیا ہے، تو اُن علاقوں میں بھی عنقریب اس طرح کے فری کیمپ لگانے کی کوشش کی جائے گی۔ انہوں نے یقین دلایا کہ اگر عوام نے مکمل تعائون فراہم کیا تو ینوپویا اسپتال کے اشتراک سے اس طرح کے کیمپ ہر ماہ بھٹکل میں رکھے جاسکیں گے۔
ڈاکٹر دنیش نائک، عنایت اللہ شاہ بندری اور مقامی سماجی ادارہ تنظیم کے رکن جناب عبداللہ دامودی صاحب نے بھی اس موقع پر اپنے خیالات کا اظہار کیا۔
دوپہر رپورٹ تحریرکئے جانے تک کیمپ میں کافی بڑی تعداد میں لوگ موجود تھے جو اپنی باری کا انتظار کررہے تھے۔