مرکزی وزیر آننت کمار ہیگڈے کا بھٹکل دورہ؛ بھٹکل بلدیہ دکانوں کے مسئلہ پر کہا، یہ قانونی اور نازک مسئلہ ہے
بھٹکل:30/ستمبر (ایس اؤنیوز)بلدیہ دکانداروں کا مسئلہ قانونی معاملہ ہے، اس کا حل بہت پیچیدہ ہے، اس مسئلے کو بہت ہی سنجیدگی سے لیتے ہوئے حل نکالنا ہوگا۔ ان خیالات کا اظہار مرکزی وزیر اور اُترکنڑا کے ممبر آف پارلیمنٹ اننت کمار ہیگڈے نےکیا۔
وہ یہاں سنیچر کی شام بھٹکل کا دورہ کرتے ہوئے پارٹی کارکنان سے مخاطب تھے۔ انہوں نے کہا کہ ریاستی حکومت مختلف وجوہات کے بہانے ہندو تنظیموں کے لیڈران کو گرفتارکررہی ہے، جگدیش کارنت اس کی ایک مثال ہے، بھٹکل میں بھی یہی معاملہ ہواہے۔ ہم نے معاملے کو لے کر افسران سے گفتگو کی ہے ، ہمیں اعتماد ہے کہ افسران اپنی حد سے آگے نہیں جائیں گے ۔ بھٹکل ایک سنگھرش کا جائے مقام ہے ، گرفتاری سے کسی کو ڈرنے کی ضرورت نہیں ہے۔
یہاں سے نکل کر وزیر موصوف مہلوک رام چندرنائک اور گرفتار شدگان گوند نائک اور کرشنا نائک کے گھر پہنچے اور گھروالوں سے ملاقات کرتے ہوئے انہیں دلاسہ دیا۔ اس موقع پر سابق رکن اسمبلی جے ڈی نائک، کاسکارڈ بینک نائب صدر ایشورنائک، بھٹکل بی جےپی صدر راجیش نائک، سنیل نائک، پرمیشور دیواڑیگا، سبرائے دیواڑیگا، بھاسکر دئیمنے ، موہن نائک، روی نائک جالی ، سنتوش نائک مرڈیشور، دنیش نائک، پرمود جوشی ، داس نائک، رام چندرنائک بینگرے ، سچن نائک وغیرہ موجود تھے۔