بھٹکل: انسٹاگرام کی دوستی پڑگئی مہنگی؛ نوجوان خاتون نے پھانسی لگا کر کی خودکشی
بھٹکل 25/اکتوبر(ایس او نیوز) اپنے انسٹاگرام بوائے فرینڈ کی ہراسانی سے تنگ آکر ایک نوجوان خاتون نے پھانسی لگاکر خودکشی کرلی۔ واردات بھٹکل کے مضافاتی علاقہ ہاڈولّی کے کوڈ مکّی میں بدھ کو پیش آئی۔
متوفی خاتون کی شناخت 22 سالہ نیترا مُتھّیا گووالی کے طورپرکی گئی ہے۔ وہ ایک وکیل کے دفترمیں کام کرتی تھی۔
بتایا گیا ہے کہ خاتون کی مُنڈلی کے رہنے والے گووردھن موگیرنامی شخص سے انسٹاگرام پردوستی ہوگئی تھی جس نے مُبینہ طور پراسے فون کرکے رقم کا مطالبہ کیاتھا اوردھمکی دی تھی کہ اگراس نے مطالبہ پورا نہیں کیا تو اس کی بعض تصاویر فیس بُک پر پوسٹ کرکے اسے بدنام کرے گا، پھر وہ کسی کے سامنے اپنا چہرہ دکھانے کے لائق نہیں رہے گی۔
پریشان خاتون نے بدنامی کے ڈر سے اپنے پرانے گھر پہنچ کر چھت سے لٹک کر خودکشی کرلی۔
متوفی لڑکی کے والد مُتھّیا گووالی نے بھٹکل مضافاتی پولیس اسٹیشن پہنچ کرگوردھن موگیر کے خلاف شکایت درج کرائی ہے اور ملزم کو گرفتار کرتے ہوئے اُس کے خلاف سخت قانونی کارروائی کا مطالبہ کیا ہے۔
مضافاتی پولس تھانہ کے پولس سب انسپکٹرشریدھرنائک نے شکایت درج کرنے کے بعد نوجوان خاتون کی لاش کا سرکاری اسپتال سے پوسٹ مارٹم کے بعد اہل خانہ کے حوالے کردیا ہے۔ چھان بین جاری ہے۔
