بھٹکل کا خاموش سماجی چہرہ، غریبوں کا خدمتگار، تعلیمی و مذہبی کارکن سید عبداللہ لنکا کا انتقال
بھٹکل:09؍اکتوبر(ایس اؤ نیوز)شہر بھٹکل کا خاموش سماجی چہرہ ،کامیاب صنعت کار، سماجی ، مذہبی قائد، غریبوں کی خدمت میں ہمیشہ ایک قدم آگے رہنے والے سید عبداللہ لنکا کا بدھ کی صبح انتقال ہونے کی خبر سماجی حلقوں کو بڑے رنج و افسوس میں مبتلا کیا ہے۔ انا للہ وانا الیہ راجعون۔
84سالہ عمر کے مرحوم سید عبداللہ لنکا شہر کے مشہور تعلیمی ادارے تربیت ایجوکیشن سوسائٹی کے سرپرست اور مجلس عاملہ کے ممبرتھے۔سادگی کا پیکر، سنجیدہ شخصیت کے مالک سید عبداللہ لنکا بھٹکل کے سماجی ، مذہبی اور تعلیمی سرگرمیوں میں ہمیشہ متحر ک و سرگرم رہا کرتے تھے۔ خاص کر ویلفئیر اسلامک سوسائٹی اور شمس اسکول کی خدمات ناقابل فراموش ہیں۔ بتایا گیا ہے کہ اسکول کے غریب و بے سہارا طلبا کی ہمیشہ وظائف اور انعام کے طورپر کافی مدد فراہم کیا کرتے تھے۔ ہرمرتبہ اسکول کے ایس ایس ایل سی امتحانات میں بہتر نتائج درج کرنےپر طلبا کے لئے خصوصی انعامات کا اعلان معمول تھا۔ اسی طرح بھٹکل مسلم خلیج کونسل اور اسلامک ویلفئیر سوسائٹی بھٹکل کے صدارت کے عہدے پر فائز رہتے ہوئے خدمات انجام دی ہیں۔ اس کے ساتھ ساتھ نوائطی ثقافت، تہذیب، ادب کے تحفظ کی فکر لےکر نوائط محفل کے صدر کی حیثیت سے خدمات انجام دی ہیں۔ حالیہ برسوں میں وہ علیل ہونے کی وجہ سے عوامی سطح پر بھی کافی کم نظر آرہے تھے۔ مرحوم کے پسماندگان میں بیوی، چار بیٹے اور تین بیٹیاں سمیت رشتہ دار ہیں۔ بدھ کی دوپہر نماز ظہر کے بعد تنظیم جمعہ مسجد میں نمازجنازہ ادا کرنے کے بعد نوائط کالونی قبرستان میں تدفین عمل میں آئی ۔ اللہ غریق رحمت کرے، جنت الفردوس میں اعلیٰ مقام عطا فرمائے اور پسماندگان کو صبر جمیل عطا کرے۔ اٰمین