ضلع شمالی کینرا میں مسلسل برسات سے دیہات ندیوں اور تالابوں میں تبدیل۔ عام زندگی ہوئی بری طرح متاثر
انکولہ،27/جولائی(ایس او نیوز)انکولہ تعلقہ میں پچھلے کئی دنوں سے جاری مسلسل برسات سے عام زندگی ویسے ہی متاثر ہوگئی تھی، مگر جمعہ کے دن ہونے والی تیز اور موسلادھار بارش کی وجہ سے چھوٹے چھوٹے دیہات ندیوں اور تالابوں میں تبدیل ہوگئے۔ گھروں میں برسات کا پانی گھسنے سے کھانے پینے کی چیزیں اور دیگر ساز وسامان بھیگ کر ناقابل استعمال ہوگئے۔
انکولہ ٹی ایم سی کے حدود میں کینی، شیرکولی وغیرہ میں برسات کا پانی گھروں میں جب گھسنے لگا تو لوگوں نے اپنا سامان دوسری جگہوں پر منتقل کرنا شروع کیا۔ بینٹ کینی کی آشریہ کالونی میں تقریباً 18مکانوں میں پانی گھس گیااور غذائی اجناس پانی سے برباد ہوگئیں۔ عوام کا کہناہے کہ برساتی پانی کی نکاسی کے لئے بنائے گئے نالوں کی صفائی میونسپالٹی کی جانب سے نہ کیے جانے سے ایسے مسائل کھڑے ہوگئے ہیں۔جب پانی نکاسی پوری طرح رک گئی تو میونسپال چیف آفیسر نے عملے کو ساتھ لے کر خودہی نالوں سے کچرا اور مٹی نکالنے کی کارروائی انجام دی۔مقامی لیڈروں کے علاوہ ولیج اکاؤنٹنٹ، ریوینیو انسپکٹروغیرہ نے راحت رسانی کی کارروائیوں کا جائزہ لیا۔
دوسری طرف نیشنل ہائی وے 66اور 63پر آئی آر بی کمپنی کی طرف سے کیے جارہے غیر سائنٹفک تعمیراتی کام کی وجہ سے ہائی وے سے بھی پانی نکاسی صحیح ڈھنگ سے نہیں ہورہی ہے۔ تیز برسات ہونے کی وجہ سے سڑک پر بہت زیادہ پانی جمع ہوگیا اور موٹر گاڑیوں کو چلانا مشکل ہوگیا۔قدرتی آفات سے نمٹنے کے لئے قائم کی گئی ٹیم نے تحصیلدار اشوک گورانی کی قیادت میں متاثرہ علاقوں کا دورہ کیا اور حالات کا جائزہ لیا۔
ہلیال سے ملنے والی خبروں کے مطابق ضلع میں بڑی مقدار میں برسات ہونے کے باوجود ہلیال کے علاقے میں سوکھا پڑا ہواتھا۔ اور وہاں برسات نہ ہونے کی وجہ سے کسانوں کے اندر بہت ہی زیادہ تشویش کا عالم تھا۔ مگر جمعہ کے دن اچانک تیز برسا ت شروع ہونے سے کسانوں نے ذرا راحت کی سانس لی ہے۔لیکن حیران کن بات یہ ہے کہ یہاں بھی صرف آدھے گھنٹے کی موسلادھار بارش کے ساتھ ہی سڑک کنارے کے نالے پانی سے ابلنے لگے اور ہر طرف پانی ہی پانی نظر آنے لگا تھا۔بتایا جاتا ہے کہ شام ہوتے ہوتے برسات کی مقدار کم ہوئی تو سڑکوں پر سے پانی اترنے لگا۔
ادھر سرسی سے ملنے والی رپورٹ کے مطابق وہاں بھی مانسون شروع ہونے کے بعد اب تک جم کر بارش نہیں برسی تھی اور عوام تیز بارش کا انتظار کررہے تھے۔ پھر جمعرات کی شب اور جمعہ کے پورے دن بھاری برسات دیکھنے کو ملی جس کی وجہ سے عام زندگی متاثر ہوئی۔دیہات اور مضافاتی علاقوں میں موسلادھار بارش کی وجہ سے ندی نالے پانی سے بھر ابلنے لگے۔ کینگرے اور اگناشینی سے قریب علاقوں میں ندی میں پانی کی سطح اتنی بڑھ گئی کہ پُلوں پر سے پانی گزرنے لگا۔ تعلقہ کے مختلف مقامات پر بارش تیز ہوجانے کی وجہ سے شہروں کی طر ف آنے جانے والوں کو بڑی دشواریوں کا سامنا کرنا پڑا۔
