بھٹکل 23/ اپریل (ایس او نیوز) کرناٹک  میں منعقدہ سکینڈ پی یو سی امتحانات کے نتائج میں پچھلے سال کے مقابلے میں   اس بار  12 فیصد کا  زبردست اضافہ  دیکھنے میں آیا ہے، بتایا جارہا ہے کہ    ملٹی پل چوائس سوالات کی شروعات سے نتائج میں کافی بہتری دیکھی گئی ہے۔

کرناٹک اسکول ایگزامینیشن اینڈ اسسمنٹ بورڈ نے جمعہ کو نتائج کا اعلان کیا جس کے مطابق ریاست کی کامیابی کا اوسط  74.67 فیصد ریکارڈ کیا گیا ہے۔ پچھلے دو سالوں میں کامیابی کا اوسط  بالترتیب 61.8 فیصد اور 61.88  فیصد تھا۔ اس طرح اس سال   12.79  فیصد بہتر نتائج  ریکارڈ کئے گئے ہیں۔

کرناٹک میں اس بار بھی ساحلی اضلاع نے  ریاست بھر میں شاندار پرفامینس پیش کرتے ہوئے اول، دوم اور چوتھا مقام حاصل کیا ہے۔ ضلع دکشن کنڑا نے   95.33 فیصد  نتائج کے ساتھ کرناٹک میں پھر ایک بار  ٹاپ کیا، اُڈپی  95.2 فیصد کے ساتھ دوسرے نمبر پر اور ضلع اُترکنڑا  89.74 فیصد کے ساتھ   چوتھے مقام پر ہے۔

اسی طرح بنگلورو دیہی 83.04 کے ساتھ نویں، بنگلورو ساؤتھ 82.3 کے ساتھ 10ویں اور بنگلورو نارتھ 82.25 کے ساتھ 11ویں نمبر پر  ہے۔

دکشن کنڑا  کے موڈبیدری میں واقع  الوا  پی یو کالج کی اننیا   نے کامرس اسٹریم میں 600 میں 600  مارکس اسکور کرتے ہوئے صد فیصد مارکس  کے ساتھ  ریاست  بھر میں ٹاپ کیا ہے۔ جبکہ شعبہ آرٹس میں  بینگلور این ایم  کےآروی کالج کی طالبہ تبسم شیخ نے  593 مارکس کے ساتھ ریاست بھر میں اول  مقام حاصل کیا ہے۔ اسی طرح شعبہ سائنس میں  جئے نگر کی این ایم کے آر وی پی یو سی  کالج کی طالبہ سوربی  اور  کولار ، سرینواس پور  گنگوتری پی یو کالج کے طالب علم ایس ایم کوشک نے 596 مارکس کے ساتھ پوری ریاست میں ٹاپ کیا ہے۔

اُڈپی کو دوسرا مقام:  ساحلی ضلع اُڈپی نے  95.2 فیصدکے ساتھ  پوری ریاست میں   دوسرا مقام حاصل کرنے میں کامیاب رہا ہے، اس کی کامیابی کی شرح  پچھلے سال کے 86.4 فیصد کے مقابلے اس سال 95.2 فیصد ہو گئی ہے۔ ایم جی ایم کالج، اڈپی کے طالب علم ساتھوک پدمانابھا بھٹ  اور پورنا پرجنا کالج، اڈپی کی طالبہ جیسویتا دیاس دونوں نے شعبہ  سائنس  میں 595 نمبرات  حاصل  کرتے ہوئے ریاست  بھر میں دوسرا مقام حاصل کیا ہے۔  جبکہ کارکلا کے  جنانا سودھا پی یو کالج کی طالبہ سمایا سدانند مابین  اور کنداپور کی   وینکٹ رامنا پی یو کالج  کی طالبہ نیہا راؤ ، دونوں نے  594 نمبرات  حاصل کرتے ہوئے  ریاست میں تیسرا مقام حاصل کیا ہے۔

ضلع اُترکنڑا کوملا چوتھا مقام، شعبہ  آرٹس  میں بھٹکل کی طالبہ ضلع میں اول:   پی یو سی سال دوم کے امتحانی نتائج میں ضلع شمالی کینرا کو مجموعی طور پر 89.74 فیصد کے ساتھ  چوتھا رینک ملا ہے ۔ اس طرح گزشتہ سال 74.33 فیصد کے ساتھ پانچویں نمبر پر  رہنے والا شمالی کینرا امسال بہتر کارکردگی کے ساتھ ایک پائدان آگے بڑھ کر اب چوتھے نمبر پر آ گیا ہے ۔ یہاں  آرٹس ، سائنس اور کامرس  تینوں  شعبوں کی  ٹاپرس لسٹ میں لڑکیوں نے بازی مارلی  ہے ۔

شمالی کینرا میں سائنس کے شعبہ میں سرسی ایم ای ایس چیتنیا پی یو کالج کی طالبہ رجتا ہیگڈے 594 مارکس کے ساتھ ضلع میں اول اور ریاستی سطح پر سوم مقام حاصل کرنے میں کامیاب ہوئی  ہے ۔ جبکہ  سداپور کے چیتنا پی یو سائنس کالج کی طالبہ چینمیا کمار نائک 592 مارکس کے ساتھ  ضلعی  سطح پر دوسرا مقام حاصل کیا ہے ۔ کاروار سرکاری پی یو کالج کی طالبہ موکشدا ارون ویرنیکر اور سرسی ایم ای ایس چیتنیا پی یو کالج کی طالبہ ریشما جی ہیگڈے نے 591 مارکس کے ساتھ تیسرا رینک حاصل کیا ہے ۔ 

شعبہ آرٹس میں  ڈپٹی ڈائریکٹر کی طرف سے  جاری کئے گئے   اعلان کے مطابق ماریکمبا سرکاری پی یو کالج  کی  طالبہ اننیا ینکپّا لمانی کو 577 مارکس کے ساتھ   اول رینک دیا گیا ہے مگر بھٹکل انجمن ویمنس کالج کی طالبہ ساجدہ احمد نثار شیخ نے 586  مارکس (97.66 فیصد) حاصل کئے  ہیں اور بھٹکل انجمن کی یہ طالبہ  ضلع بھر میں اول رینک سے کامیاب ہوئی ہیں ۔  

کامرس  شعبہ میں سرسی ایم ای ایس پی یو کالج کی طالبہ اچلا وی ہیگڈے نے 593 مارکس کے ساتھ پہلا رینک حاصل کیا ہے جبکہ اسی کالج کی طالبہ انجلی اڈپیکر نے 591  مارکس کے ساتھ دوم اور مرڈیشور کے آر این شیٹی پی یو کالج کے طالب علم سندیش شیٹی نے 590 مارکس کے ساتھ سوم مقام حاصل کیا ہے ۔ 

شمالی کینرا میں امسال جملہ 14,345 طلبہ نے پی یو سال دوم کا امتحان دیا تھا  ان میں سے 12,240 طلبہ  کامیاب ہوئے ہیں۔