بھٹکل21/جون (ایس او نیوز) ضلع شمالی کینرا ورکنگ جرنلسٹ ایسو سی ایشن کی طرف سے دئے جانے والے سالانہ ایوارڈ کے لئے سینئر صحافی اور ریاستی کمیٹی کے رکن جی سبرایا بھٹ مکّل اور یلاپور یونٹ کے صدر نرسمہا ساتوڈی کو نامزد کیا گیا ہے۔
ورکنگ جرنلسٹ ایسو سی ایشن کے ضلعی صدر رادھاکرشنا بھٹ نے بھٹکل میں اخباری بیان جاری کرتے ہوئے یہ بات بتائی ہے۔ ہر سال تفویض کیے جانے والے شیام راؤ ایوارڈ کے لئے حال ہی میں سرسی میں منعقدہ ایسو سی ایشن کی ورکنگ کمیٹی میٹنگ میں بالاتفاق سینئر صحافی اور مصنف سبرایا بھٹ مکّل کے نام کو منظوری دی گئی۔اس کے علاوہ آنجہانی جی ایس ہیگڈے اجّیبل کی یاد میں دئے جانے والے ’اجّیبل‘ ایوارڈ کے لئے کمیٹی نے یلاپور کے صحافی نرسمہا ساتوڈی کے نام پر مہر لگائی ہے۔اخباری بیان کے مطابق دونوں ایوارڈ 6 جولائی کو بھٹکل تعلقہ کے مرڈیشور میں منعقد ہونے والے ضلعی یوم صحافت کے موقع پر تفویض کیے جائیں گے۔