اڈپی28/اکتوبر (ایس او نیوز) معاشرے میں بڑھتی ہوئی منشیات کی لت کی وجہ سے ہر باشعور پریشان ہے۔اس پر قابو پانے کے لئے اڈپی ضلع پولیس نے منشیات کے خلاف ایک خصوصی مہم شروع کی ہے۔

گزشتہ ایک ہفتے سے اڈپی شہر اور منی پال سمیت ضلع کے دیگر علاقوں میں اس مخالف منشیات مہم کو تیز کردیا گیا ہے۔اس دوران 34افراد کا منشیات کے استعمال کے تعلق سے طبی معائنہ کیا گیااور 34کیس درج کرلیے گئے ہیں۔بتایا جاتا ہے کہ منی پال پولیس نے دس کیس، سی ای این کرائم پولیس نے 18کیس درج کرلیے ہیں۔منی پال پولیس نے جودس کیس درج کیے ہیں ان میں سے 5اور سی ای این پولیس کی طرف سے درج کردہ 18میں سے 17معاملات میں طلبہ ملوث ہیں۔

پولیس افسران کا کہنا ہے کہ نوجوان نسل منشیات کی بری طرح عادی ہوگئی ہے اور خطرناک تباہی کی طرف بڑ ھ رہی ہے۔انہوں نے والدین اورسرپرستوں سے درخواست کی ہے کہ وہ اپنے بچوں کے معمولات اور ان کی سرگرمیوں پر پوری طرح نظر رکھیں۔پولیس نے عوام سے بھی گزارش کی ہے کہ منشیات کے استعمال اور فروخت کے سلسلے میں اگر ان کے پاس کوئی معلومات ہوتو فوری طور پرپولیس تک یہ معلومات پہنچائیں۔

منشیات مخالف مہم کے حوالے سے ضلع پولیس کی جانب سے منشیات کے نقصانات کے بارے میں اسکولوں ااور کالجوں میں مختلف پروگرام منعقد کیے جارہے ہیں۔پولیس کا کہنا ہے کہ یہ خصوصی مہم ابھی کچھ اور دنوں تک جاری رہے گی۔