اڈپی: بیکری آون میں دھماکہ سے فوڈ فیکٹری کا مالک ہوگیا ہلاک
اڈپی،10؍اگست (ایس او نیوز) اڈپی ضلع کے برہماور تعلق میں مابوکلا کے مقام پر آج صبح 8بجے کے قریب ایک المناک حادثہ پیش آیا جس میں ایک شخص کی موت واقع ہوگئی ہے۔
موصولہ رپورٹ کے مطابق فرٹاڈو فوڈ پروڈکٹس نامی ایک فیکٹری کا مالک رابرٹ فرٹاڈو(53سال) صبح جب اپنی فیکٹری کے بہت بڑے سائز کے بیکری آون کو آپریٹ کرنے کے لئے اس کے قریب پہنچا تواس میں اچانک زبردست دھماکہ ہوگیا۔دھماکہ کے ساتھ ہی آون کا دروازہ الگ ہوکر بڑی تیزی سے رابرٹ سے ٹکرایا جس کی وجہ سے اس کے جسم کے چیتھڑے اڑ گئے۔
دھماکے اور ہلاکت کی اطلاع ملتے ہی کوٹا پولیس اسٹیشن کے افسران جائے واردات پر پہنچ گئے اور معائنہ کرنے کے بعد کیس درج کرلیا ہے۔ مزید تحقیقات جاری ہے۔