بھٹکل 30 اگست(ایس او نیوز) مشہور و معروف سیاحتی مقام مرڈیشور میں آج دو سیاح بحر عرب میں غرق ہوکر ہلاک ہوگئے جن میں ایک کا تعلق مغربی بنگال سے اور دوسرے کا شموگہ کے سورب سے بتایا گیا ہے۔
ذرائع سے ملی اطلاع کے مطابق مغربی بنگال کا رہنے والا ابھیجیت روبیندرا بہادر سنگھ (24) بنگلور میں کسی کمپنی میں ملازمت کرتا تھا، پیر کو بیندور میں منعقدہ شادی کی تقریب میں شریک ہونے اپنے 9 دوستوں کے ساتھ بیندور آیا تھا۔ آج دوپہر قریب تین بجے تمام دس لوگ تفریح کرنے مرڈیشور پہنچے تھے، تین بجے مندر میں پوجا پاٹ کے بعد قریب 3:15 بجے دس میں سے پانچ لوگ سمندر میں تیرنے کے لئے اُترے تھے کہ اچانک ابھیجیت اونچی اُٹھتی لہروں کی زد میں آگیا اور سمندر میں غرق ہوگیا۔ اسی دوران شموگہ سے آئے ہوئے قافلے میں سے شرد جگدیش بلاری (18) نامی نوجوان بھی سمندری لہروں میں بہہ کر غرق ہوگیا۔ کافی تلاشی کے بعد شام کو دونوں کی لاشیں برآمد کرلی گئیں۔
شرد کے تعلق سے بتایا گیا ہے کہ وہ شموگہ کے سورب سے اپنے بہن بھائیوں کے ساتھ مرڈیشور تفریح کےلئے پہنچا تھا، سبھی لوگ سمندر میں موج مستی میں لگے ہوئے تھے کہ اس دوران ایک لہر اسے اپنے ساتھ لے گئی، پھر اس کی نعش ہی باہر آسکی۔
مرڈیشور پولس تھانہ میں معاملہ درج کیا گیا ہے اور دونوں کی نعشیں پوسٹ مارٹم کے لئے مرڈیشور کے مردہ خانے میں منتقل کی گئی ہے۔